QR Mádeniet jáne sport ministrligi Sport jáne dene shynyqtyrý komitetiniń tóraǵasy Serik Sápiev qazaqstandyq shańǵyshy Aleksei Poltoraninniń basyndaǵy daýǵa qatysty jaǵdaidyń qandai bolyp jatqanyn aityp berdi, dep habarlaidy QazAqparat tilshisi.
«Odan aýstriialyq politsiia jaýap aldy. Bálkim, ol materialdardy WADA-ǵa jóneltilgen de shyǵar. WADA áli de tergeý júrgizip jatyr. Tergeýdiń qashanǵa deiin jalǵasatynyn bilmeimiz. Ony saiystarǵa sportshy retinde qatysý múmkindigi toqtatylyp otyr. Biz áli de kútip otyrmyz», - dedi Serik Sápiev Memlekettik qyzmet isteri jáne sybailas jemqorlyqqa qarsy is-qimyl agenttiginde ótken baspasóz máslihatynan keiin tilshilerge suraqtaryna bergen jaýabynda.
Onyń aitýynsha, tergeý amaldary uzaqqa sozylyp ketetin bolsa, ministrlik naqty sheshimniń qashan jariialanatyny jaily suraqpen WADA-ǵa shyǵatyn bolady.
- Poltoranin men bapkerine elge kelip, jaǵdaidy túsindirýdi talap ettińizder me?
- Meniń oiymsha, ol jaqynda kelip, bálkim keń-molynan suhbat beredi. Ázirge ol demalyp jatyr. Meniń topshylaýymsha, ol eshkimmen kezdeskisi kelmeitin sekildi.
- Siz ol jaǵdaidan beri Alekseimen sóilestińiz be?
- Biz onymen birneshe ret sóilestik. Moraldyq turǵydan qoldaý bildirdim. Qashan ushyp keletinin suramadym.
- Onyń Máskeýde týystary bar ma?
- Iá.
- Mádeniet jáne sport ministrligi aiyppul sanktsiialaryn engizýdi oilastyryp jatqan joq pa?
- Joq, álbette. Ázirge qarastyryp jatqan joqpyz.
- Ekipirovkany qaitarý sekildi reglamentter oryndala ma?
- Qazirgi ýaqytta qandai da bir aiyppul nemese qaitarym, ákimshilik tárkileý qarastyrylmaǵan. Jýyrda antidopingtik ereje boiynsha zań kúshine enedi...
- Demek, ol Máskeýde jatyp alyp eshkimmen bailanysqa shyqpaý quqyǵyna ie me?
- Joq, ondai quqyǵy joq.
- Ministr (Arystanbek Muhamediuly - avt.) Poltoraninniń resmi málimdeme jasaitynyn aitqan edi. Dese de, áli sportshy únsiz...
- Biz adamdy májbúrlei almaimyz. Kelip, baspasóz máslihatynda jaǵdaidy túsindirer dep oiladyq. Ázirge kútip otyrmyz. Meniń oiymsha, ol báribir kelip, jaǵdaidy túsindiredi.
Eske sala ketsek, 27 aqpanda nemis jýrnalisi Haio Zeppelt Týitterde Aýstriianyń Zeefelde qalasynda shańǵy jarysynan ótip jatqan álem chempionatynda Qazaqstan, Aýstriia men Estoniia sportshylary antidopingtik erejelerdi buzdy degen kúdikke ilingenin jazdy. Olardyń qatarynda Aleksei Poltoranin da bar. Sportshynyń bapkeri atalmysh oqiǵaǵa bailanysty málimdeme jasaǵan edi.
