Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev Tokio Olimpiadasynda el namysyn qorǵaǵan boksshylardyń ónerine baǵasyn berdi, dep habarlaidy QazAqparat.
«Boks boiynsha altyn medal bolmaǵandyqtan jaǵdaidy nashar der edim. Buǵan deiin Olimpiada oiyndarynda altyn júlde bolatyn. Jalpy tórelik barynsha obektivti túrde boldy dep aita alamyn.
Degenmen búgingi jartylai finalda men Bibosynov jeńdi dep bilemin. Birinshi raýndta soqqyny jiberip alǵandyqtan, tóreshilerdiń bári birdei upaidy Sákenniń qarsylasy bolǵan aǵylshyn boksshysyna berdi. Al ekinshi raýndta 2:3 esebimen bizdiń sportshy basym tústi. Úshinshi raýndta tóreshi 3:2 upaimen jeńisti Bibosynovqa berdi.
Tóreshiler ádil baǵa berdi me, jaýapty solardyń ar-uiatyna qaldyrdyq, jeke meniń oiym – Sáken jeńdi. Onyń «altyn» alý múmkindigi bar edi», - dedi Serik Sápiev Ortalyq kommýnikalar qyzmetinde onlain ótken baspasóz máslihatynda.
Onyń aitýynsha, Tokio Olimpiada oiyndarynda boksshylar joǵary óner kórsete almady.
«Basqa boksshylardyń da nátijesi máz emes, keibir sportshylar tiisti deńgeidegi daiyndyqpen kelmedi. Jalpy boksshylar Olimpiadada «altyn» almaǵandyqtan, kórsetkish nashar dep esepteimin», - deidi ol.
