Tokio Olimpiadasyndaǵy tómen nátije úshin sport túrleriniń bas bapkerleri jaýapty bolady. Bul týraly QR Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev aitty, dep habarlaidy QazAqparat.
«Ár jarystan keiin bizde talqylaý, keńeitilgen jinalys ótkiziledi. Árine, osy Olimpiadadan keiin de bul nátijeniń sebepteri anyqtalady. Sodan keiin ǵana qandai sharalar qabyldaý kerektigin sheshemiz. Eger qatelikter jiberilse nemese nátije bolmasa, shara qabyldaimyz. Joǵaryda aityp ótkenimdei, aldyn ala qorytyndy jasamai-aq qoiaiyq. Áli basqa da sport túrleri bar. Nashar nátijeler úshin ár sport boiynsha bas jattyqtyrýshylar jaýapty bolady. Biz olarǵa daiyndyqty senip tapsyramyz. Sondyqtan bas jattyqtyrýshylardan talap etip, tiisti sheshimder qabyldaimyz», - dedi S. Sápiev Ortalyq kommýnikatsiialar qyzmetinde.
«Olimpiada áli ótip jatyr. Sportshylarymyzǵa qoldaý kórseteiik. Biz áli nátije kórsetemiz», - dep qorytyndylady S. Sápiev.
Aita keteiik, Tokioda ótip jatqan Olimpiada oiyndarynyń medaldar kestesinde Qazaqstan qorjynynda burynǵysha úsh «qola» ǵana bar. Júldegerler – dziýdoshy Eldos Smetov, aýyr atletter Igor Son jáne Zúlfiia Chinshanlo.
