توكيو وليمپياداسىنداعى تٶمەن نەتيجە ٷشٸن سپورت تٷرلەرٸنٸڭ باس باپكەرلەرٸ جاۋاپتى بولادى. بۇل تۋرالى قر مەدەنيەت جەنە سپورت مينيسترلٸگٸ سپورت جەنە دەنە شىنىقتىرۋ ٸستەرٸ كوميتەتٸنٸڭ تٶراعاسى سەرٸك سەپيەۆ ايتتى, دەپ حابارلايدى قازاقپارات.
«ەر جارىستان كەيٸن بٸزدە تالقىلاۋ, كەڭەيتٸلگەن جينالىس ٶتكٸزٸلەدٸ. ەرينە, وسى وليمپيادادان كەيٸن دە بۇل نەتيجەنٸڭ سەبەپتەرٸ انىقتالادى. سودان كەيٸن عانا قانداي شارالار قابىلداۋ كەرەكتٸگٸن شەشەمٸز. ەگەر قاتەلٸكتەر جٸبەرٸلسە نەمەسە نەتيجە بولماسا, شارا قابىلدايمىز. جوعارىدا ايتىپ ٶتكەنٸمدەي, الدىن الا قورىتىندى جاساماي-اق قويايىق. ەلٸ باسقا دا سپورت تٷرلەرٸ بار. ناشار نەتيجەلەر ٷشٸن ەر سپورت بويىنشا باس جاتتىقتىرۋشىلار جاۋاپتى بولادى. بٸز ولارعا دايىندىقتى سەنٸپ تاپسىرامىز. سوندىقتان باس جاتتىقتىرۋشىلاردان تالاپ ەتٸپ, تيٸستٸ شەشٸمدەر قابىلدايمىز», - دەدٸ س. سەپيەۆ ورتالىق كوممۋنيكاتسييالار قىزمەتٸندە.
«وليمپيادا ەلٸ ٶتٸپ جاتىر. سپورتشىلارىمىزعا قولداۋ كٶرسەتەيٸك. بٸز ەلٸ نەتيجە كٶرسەتەمٸز», - دەپ قورىتىندىلادى س. سەپيەۆ.
ايتا كەتەيٸك, توكيودا ٶتٸپ جاتقان وليمپيادا ويىندارىنىڭ مەدالدار كەستەسٸندە قازاقستان قورجىنىندا بۇرىنعىشا ٷش «قولا» عانا بار. جٷلدەگەرلەر – دزيۋدوشى ەلدوس سمەتوۆ, اۋىر اتلەتتەر يگور سون جەنە زٷلفييا چينشانلو.
