QR Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápievtiń qamaýǵa alynǵany týraly áleýmettik jelide taraǵan aqparatqa túsinik berdi, dep habarlaidy "Ult aqparat".
Sport komitetiniń baspasóz qyzmetinen málim etkendei, S.Sápiev bala kútimine bailanysty eńbek demalysyna shyqty, al onyń ustalǵany týraly alyp-qashpa áńgimeler - jalǵan.
«Serik Sápiev tamyzdyń 12-sinen jeltoqsannyń 23-ine deiin bala kútimine bailanysty resmi túrde eńbek demalysyna shyqty. Al komitet tóraǵasynyń mindeti onyń orynbasary Serik Jarasbaevqa júkteldi», - dedi komitettiń baspasóz qyzmetinen.
Bul rette, áleýmettik jelide Sport jáne dene shynyqtyrý isteri komitetiniń tóraǵasy, bokstan Olimpiada chempiony Serik Sápievtiń Aqtaýdaǵy «Rixos Water World Aktau» qonaqúii qonaqtaryn óziniń sheberlik sabaǵyna shaqyrǵan videosy tarady.
