Fotokollaj: Azattyq Rýhy
Bas prokýratýra Almaty oblysy politsiia departamentiniń burynǵy basshysy Serik Kúdebaev elden qalai qashyp ketkenin aitty, dep habarlaidy Sputnik Qazaqstan.
Bas prokýrordyń orynbasary Jandos Ómirálievtiń aitýynsha, qashqyn general-maior shekaradaǵy ótkizý beketinen ótpegen.
"Onyń bergen jaýabyna sáikes, ol Kegen aýdanynda shekarada temir tordyń astyn kóterý arqyly ótip ketken", dedi Ómiráliev Májilis kýlýarynda.
Onyń aitýynsha, Kúdebaevtyń elden qashý faktisi boiynsha qozǵalǵan qylmystyq is aiaqtalǵan jáne sotqa joldanǵan. Eń basty aiyptalýshy - Kúdebaevtyń ózi.
"Ol bizdiń shekaramyzdan tys jerden Qyrǵyzstan memleketine ótken. Ony shekaraǵa jetkizgen kólik júrgizýshisi mundai áreketke baratynynan beihabar bolǵan. Sol sebepti ózi ǵana jaýapqa tartylyp jatyr", - dep naqtylady Bas prokýrordyń orynbasary.
Ol sondai-aq Kúdebaev osy qylmysy úshin qosymsha jaza arqalaitynyn aitty.
Eske salsaq, biyl 3 sáýirde Almaty oblysy politsiia departamentiniń burynǵy basshysy Serik Kúdebaevqa izdeý jariialandy. Oǵan eks-politseidiń elden qashýy sebep boldy.
23 naýryzda Kúdebaev qazaq-qyrǵyz shekarasyn kesip ótip, sol kúni Bishkekten Stambýlǵa ushyp ketken. Ulttyq qaýipsizdik komiteti shetelge qashqan Kúdebaev shekaradan resmi jumys istep turǵan ótkizý beketteri arqyly ótpegenin málimdedi.
Serik Kúdebaevqa qańtardaǵy tártipsizdikter kezinde qyzmet babyn asyra paidalandy degen aiyp taǵylǵan bolatyn. Prokýror ony 9 jylǵa bas bostandyǵynan aiyrýdy suraǵannan keiin general-maior sotqa barýdy toqtatqan. Otyrys generaldyń kelmeýine bailanysty 5 ret keiinge shegerildi.
27 sáýirde Serik Kúdebaevtyń ustalǵany habarlandy. Resmi aqparat boiynsha, ol Túrkiiada ustalyp, arnaiy bortpen Qazaqstanǵa qaitarylǵan. Alaida onyń otbasy Kúdebaev óz erkimen elge oralǵanyn málimdedi.
28 sáýirde Taldyqorǵan qalalyq sotynyń úkimimen Serik Kúdebaev Qylmystyq kodekstiń 146-baby 2-tarmaǵy 1-tarmaqshasy "Azaptaý" jáne 362-baby 4-tarmaǵy – Bilikti nemese laýazymdyq ókilettigin asyra paidalaný" baptary boiynsha kináli dep tanylyp, 10 jylǵa sottaldy. Ol jazasyn qaýipsizdigi ortasha koloniiada óteidi.
Aita keteri, Serik Qúdebaev Almaty oblysynyń politsiiasyn 2020 jyldyń qańtarynan 2022 jyldyń qańtaryna deiin basqardy. Buǵan deiin ol alty jyldan astam Almaty politsiiasy departamentiniń bastyǵy bolǵan.
