Foto: © Ratel.kz / Aliia Ahmedieva
Almaty oblystyq politsiia departamentiniń burynǵy bastyǵy Serik Kúdebaev taýly jer arqyly shekara kesip ótýi múmkin. Bul týraly Ulttyq qaýipsizdik komiteti tóraǵasynyń orynbasary – Shekara qyzmetiniń direktory Erlan Aldajumanov aitty, dep habarlaidy QazAqparat agenttigi.
«Qyrǵyzstanmen memlekettik shekara 1 257 shaqyrymǵa sozylyp jatyr. Almaty baǵytynda bizde Alataý taýly alqaby bar. Menińshe, niet bolsa jáne bul baǵytta kúzetýge qajet tehnikalyq quraldar joq ekenin eskere otyryp, osy taýlar arqyly memlekettik shekarany kesip ótý múmkindigi bar. Muny anyqtaý úshin tekserý júrgizilip jatyr», - dedi Aldajumanov Májilistiń jalpy otyrysynan keiin BAQ ókilderiniń saýalyna orai.
Onyń dereginshe, kúdiktiniń qaida ekenin anyqtaý úshin Ulttyq qaýipsizdik komitetimen birlesken top qurylǵan. Sonymen qatar Ishki ister ministrligi men ózge de memlekettik organdar janynda arnaýly top jumys istep jatyr. 5 shekara beketiniń 300-ge jýyq qyzmetkeri de osy jumysqa jumyldyrylǵan.
Sonymen qatar ol BAQ ókilderiniń Serik Kúdebaevtyń qashyp ketkeni jaily aqparat nelikten kesh jariialanǵany týraly saýalyna jaýap berdi.
«Biz onyń qashyp ketken-ketpegenin bilmedik. Buǵan deiin de atap ótkenimdei, ol memlekettik shekarany resmi ótkizý pýnkteri arqyly kesip ótken joq», - dedi ol.
Eske sala keteiik, 3 sáýirde Serik Kúdebaevqa halyqaralyq izdeý jariialanǵan bolatyn. Alaida, búgin kúdiktiniń el aýmaǵynan tysqary boi tasalaǵanyn shekara qyzmeti naýryzdyń 27-i kúni bir-aq bilgeni anyqtaldy.
