Qazaqstan zańgerler odaǵynyń tóraǵasy Serik Aqylbai beibit jinalystardy uiymdastyrý jáne ótkizý tártibi týraly zańǵa qatysty pikir bildirdi, dep habarlaidy QazAqparat.
«Jalpy, bul zań biraz talqylandy, iaǵni qoǵamdyq talqylaý kóp boldy. Árine, burynǵy qujatqa qaraǵanda qazirgi zań aitarlyqtai ilgerileýdi baiqatyp otyr. Osy oraida bul baǵytta jasalǵan qadamdardy tolyqtai qoldaimyn. Sebebi «Azamattar týraly pakti» degen halyqaralyq qujat bar, sonda adamdardyń quqyqtary tolyqtai saqtalýy tiistigi kórsetilgen. Bizdiń Konstitýtsiiada da onyń barlyǵy eskerilgen», - dedi S. Aqylbai.
Bul turǵyda ol «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Zańy burynǵy zańnamaǵa qaraǵanda eleýli túzetýlerdi qamtyǵanyn atap ótti.
Beibit jinalystardy ótkizý tártibi naqtylanǵanyna toqtalǵan S. Aqylbai: «Osy oraida óziniń pikirin aitýshylardyń quqyǵyn ǵana emes, jalpy qoǵamnyń quqyǵy saqtalýy kerek. Mysaly, mitingige qatyspaityn basqa adamdardyń, avtobýsqa otyrǵan jolaýshylardyń, kóshede serýendep júrgenderdiń quqyǵy buzylmaýy tiis. Sondyqtan osy zańda bul máselege qatysty durys sheshim qabyldanǵan», - dedi.
Sonymen qatar Qazaqstan zańgerler odaǵynyń tóraǵasy atalǵan qujatta miting, jinalys, demonstratsiia men sherýge qatysty naqty sipattama berilgenin tilge tiek etti.
«Qazirgi ýaqytta biz tsifrlyq tehnologiiany keńinen paidalanyp kelemiz. Beibit jinalystardy uiymdastyrý men ótkizý úshin belgilengen arnaiy oryndarda onlain rejimde kórsetetin quraldar bolady, buqaralyq aqparat quraldarynyń ókilderi keledi. Jinalysta aitylǵan máseleniń barlyǵyn tikelei efirden kórý múmkindigi jasalady. Iaǵni, halyqtyń quqyǵy tolyqtai halyqaralyq konventsiiaǵa sáikes saqtalǵan. Sondyqtan bul zańdy óte durys qujat dep sanaimyn», - dedi Serik Aqylbai.
Eske sala keteiik, biyl 14 mamyrda QR Parlamentiniń Senaty «Qazaqstan Respýblikasynda beibit jinalystardy uiymdastyrý jáne ótkizý tártibi týraly» Qazaqstan Respýblikasy Zańy jobasyna birqatar túzetý engizdi.
Al búgin Parlament Májilisiniń jalpy otyrysynda depýtattar «QR-da beibit jinalystardy uiymdastyrý jáne ótkizý tártibi týraly» zań jobasyna Senat engizgen ózgerister men tolyqtyrýlardy qoldap, daýys berdi.
