Sybailas jemqorlyqqa qarsy ADAL BILIM jobalyq keńsesiniń ákimshisi Sergei Pen ýniversitet oqytýshylary nege ǵylymmen ainalyspaityny týraly aitty.
«Onyń basty sebebi - ǵalymdardyń jalaqysynyń tómendigi. Eger bakalavriat, magistratýra, doktorantýra túlekteri ǵylymmen ainalysqysy kelse de, ekonomikalyq jaǵdailar kedergi keltiredi. Qazir daryndy jastardy akademiialyq jolǵa shaqyrý qiyn. Elimizde ǵylymǵa 82 mlrd. teńgege jýyq qarjy bólinedi. Soǵan qaramastan Ǵylym komitetine qarasty ǵylymi uiymdardyń ortasha jalaqysy 136 myń teńgeni quraidy. Mundai jalaqy kimge kerek? Dollarmen eseptesek, bul jalaqy tipti 10 jyl buryn da az bolǵan. Elimizdegi tikelei qarjylandyrý júiesin ǵalymdardyń eńbekaqysyn joǵary jalaqy tólenetin memlekettik qyzmetshilerdiń sanatymen teńestiretin nemisterdiń modeline kóshýdi usynamyn», - dep túsindirdi Sergei Pen ADAL BILIM alańyndaǵy tikelei efirde.
Talqylaý barysynda jas ǵalym Maqsat Jabaǵin da otandyq ǵylym salasyn granttyq qarjylandyrý tujyrymdamasyn qaita qaraýdy usyndy. Atalǵan saladaǵy problemalardy sheshýdiń joldaryn usynyp, ǵalymdardy tikelei qarjylandyrýdyń ózge jolyn usyndy.
«Bizdegi granttyq qarjylandyrý júiesinde únemi ǵalymnyń ózi emes, ǵylymi ideiasy birinshi orynda turady. Sondyqtan bolashaqta bul tujyrymdamany qaita qarastyryp, aldyńǵy orynǵa ǵalymdardy qoiý qajet. PhD dárejesin qorǵaǵandardyń báriniń ǵylymi zertteýlerine konkýrssyz-aq alǵashqy granttaryn berý kerek. Keiin ol kásibi turǵyda damidy jáne biliktiligi artqan saiyn oǵan kelesi granttar beriledi. Eger ol qandai da bir pozitsiialyq kezeńde tiisti talaptarǵa sai kelmei qalsa, granttyq qarjylandyrý boiynsha básekelestik ortaǵa túsedi. Iaǵni bul - ǵalymdardy tikelei qarjylandyrý júiesiniń balamasy», - dedi QR BǴM ǴQ «Ulttyq biotehnologiia ortalyǵynyń» Adam genetikasy zerthanasynyń meńgerýshisi Maqsat Jabaǵin.
