Almatyda jyl sońyna deiin 380 «Sergek» beinebaqylaý kameralaryn ornatý josparlanyp otyr, dep habarlaidy "Ult aqparat".
Politsiianyń málimetinshe, 4 aidyń qorytyndysy boiynsha jol-kólik oqiǵalary 28,4% – ǵa azaiǵan. Jalpy 765 kólik apaty tirkeldi, sonyń saldarynan 23 adam qaza taýyp, 884 adam túrli dene jaraqatyn aldy.
«Apattar sanynyń azaiýy «Sergek « APK beinebaqylaý kameralaryn ornatýmen bailanysty. Qazirgi ýaqytta Almatyda 404 «Sergek» kamerasy jumys isteidi. 2020 jyldyń aiaǵyna deiin qosymsha 380 kamerany (210 jol qiylysy, 170 syzyqty aimaqtarda) ornatý josparlanýda. 2020 jyldyń 4 aiynda «Sergek» APK kameralarynyń kómegimen 60 myńnan astam jol qozǵalysy erejeleriniń buzylýy anyqtaldy. 436 million teńgeden astam somada aiyppul salyndy. Sondai-aq, qalada 105 postan turatyn «BDD» AAJ quryldy. Kameralar ornatylǵan jerlerde jyl saiyn jol qozǵalysy erejeleriniń buzylýy 20% -ǵa tómendeýde», - dedi Almaty qalalyq politsiia departamentiniń bastyǵy Qanat Taimerdenov.
Jalpy jyl basynan beri qala joldarynda 214 506 jol erejelerin buzý faktileri anyqtalyp, 1,2 milliard teńgege aiyppul salyndy.
«Ákimshilik jaýapkershilikke 76 648 ereje buzýshy tartyldy, onyń ishinde 74 479 júrgizýshi, al 276 júrgizýshi mas kúiinde kólik júrgizgeni úshin ustalǵan. Sot 379 júrgizýshini kólik quralyn basqarý quqyǵynan aiyrdy. 235 júrgizýshi ákimshilik qamaýǵa alyndy», - dedi Qanat Taimerdenov.
