Elorda turǵyny áleýmettik jelide «Sergek» beinebaqylaý júiesiniń baǵany ústine qulap, aiaǵyn jaraqattaǵanyn aityp shaǵymdandy, dep habarlaidy QazAqparat.
Bul jaiynda qala turǵyny Instagram jelisindegi pablikterdiń birinde jazdy.
«Syǵanaq kóshesi, 11 mekenjaiynda, «Sunrise» turǵyn úi keshenine taqaý mańda saǵat 13:20-da baǵdarshamdy kútip turǵanymda «Sergek» baǵany qulady. Abyroi bolǵanda bir qadam artqa sheginip úlgerdim. Áitpese basyma qular edi. Kimge shaǵymdanýǵa bolady? Ólimge bir qadam ǵana qaldym», - dep jazdy elordalyq áiel.
Sonymen qatar ol baǵanadan zardap shekken aiaǵynyń gipspen oralǵan sýretin kórsetti jáne óziniń jumyssyz qalǵanyn atap ótti.
Bul shaǵymǵa qalalyq politsiia departamenti jaýap berdi.
«Osy jyldyń 23 qazanynda Syǵanaq kóshesi boiynda «Sunrise» turǵyn úi keshenine qarama-qarsy jerde joldan ótpek bolǵan 45 jastaǵy áiel «Sergek» kameralary ilingen metall baǵannyń qulaýy saldarynan aiaǵyn jaraqattap aldy. Atalǵan fakti boiynsha Esil aýdandyq politsiia basqarmasy QR Qylmystyq kodeksiniń 306-babymen sotqa deiingi tergeýdi bastady, tekserý júrip jatyr», - dedi politsiia departamentiniń baspasóz qyzmetinen.
