Serbiia Prezidenti Aleksandr Výchich Belgradta jaqyn arada Qazaqstan Elshiligi ashylatyndyǵyna úmit bildirdi. Ol bul týraly búgin Aqordada Elbasy Nursultan Nazarbaevpen kelissózderden keiingi birlesken málimdeme barysynda aitty, dep habarlaidy QazAqparat tilshisi.
«Saiasi yntymaqtastyǵymyzdyń joǵary deńgeide bolýy qýantady. Buǵan qosa, biz halyqaralyq arenada da yntymaqtastyqty jolǵa qoiǵanbyz. Qurmetti Prezident myrza, Sizdiń Serbiianyń ómirlik mańyzdy ulttyq jáne memlekettik múddesin qorǵaýda, ásirese Kosovoǵa qatysty máselelerdegi berik ustanymyzǵa alǵysymdy bildiremin. Bizdiń aýmaqtyq tutastyǵymyzdy, táýelsizdigimiz ben egemendigimizdi qoldaǵanyńyz úshin úlken rahmetimdi aitamyn», - dedi Aleksandr Výchich.
Sonymen qatar Serbiia Prezidenti eki eldiń arasyndaǵy ekonomikalyq yntymaqtastyqtyń mańyzdylyǵyn atap ótti.
«Aldaǵy ýaqytta yntymaqtastyǵymyzdy nyǵaita túsip, taýar ainalymymyzdy arttyratyndyǵymyzǵa senimdimin. Óitkeni, oǵan áli paidalanylmaǵan áleýettiń jaqsy irgetasy bar. Sizder taiaý arada Belgradta Qazaqstan Elshiligin ashsańyzdar, qýanyshty bolar edik. Bul bizdiń úlken ótinishimiz», - dedi Serbiia Prezidenti.
Aita keteiik, Serbiia basshysy Qazaqstan Prezidenti Nursultan Nazarbaevtyń shaqyrýymen resmi saparmen kelip otyr. Búgin mártebeli meiman Aqordada Elbasymen kezdesý ótkizdi.
Kezdesý barysynda Nursultan Nazarbaev Serbiia Prezidentin «Dostyq» ordenimen marapattady.
Al Aleksandr Výchich Qazaqstan Prezidentine óz eliniń eń joǵary nagradasy «Serbiia Respýblikasy» ordenin tabys etti.
Sapar aiasynda Aleksandr Výchich Qazaqstan-Serbiia iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.
Serbiia Prezidentiniń sapary barysynda birqatar mańyzdy qujattarǵa qol qoiylmaq. Onyń ishinde Qazaqstan men Serbiia úkimetteri arasyndaǵy qylmysqa qarsy kúrestegi yntymaqtastyq týraly kelisim, sondai-aq Qazaqstannyń Qoǵamdyq damý ministrligi men Serbiianyń Jastar saiasaty jáne sport ministrligi arasyndaǵy ózara túsinistik týraly memorandým bar.
