Senat tóraǵasy Máýlen Áshimbaev jýrnalister arasyndaǵy «Amanat» jáne «Týǵan el» baiqaýlarynyń jeńimpazdary men júldegerlerin marapattady, dep habarlaidy "Ult aqparat" Senattyń baspasóz qyzmetine silteme jasap.
Máýlen Áshimbaev júldelerdiń Táýelsizdik kúni qarsańynda tapsyrylýynyń simvoldyq máni bar ekenine nazar aýdardy.
«Táýelsizdik – bizdiń eń basty qundylyǵymyz. Shyn máninde, Táýelsizdiktiń arqasynda eńseli el boldyq. Búkil álem moiyndaǵan memleket retinde qalyptastyq. Ekonomikada, saiasatta, áleýmettik jáne rýhani baǵytta aýyz toltyryp aitarlyqtai jetistikterge qol jetkizdik. Otandyq buqaralyq aqparat quraldarynyń jáne jýrnalistikanyń damýy da osy egemendiktiń arqasy», – dedi Senat tóraǵasy.
Sonymen qatar Máýlen Áshimbaev Parlament qabyldaǵan ár zań men sheshimdi halyqqa jetkizip, aqparat taratýda buqaralyq aqparat quraldarynyń mańyzy zor ekenin atap ótti.
«Qazirgi tańda Memleket basshysynyń tapsyrmasymen kóptegen tyń bastamalar qolǵa alynýda. Soǵan bailanysty azamattardyń áleýmettik jaǵdaiyn jaqsartýǵa, adam quqyǵyn qamtamasyz etýge, densaýlyq saqtaý, bilim berý salalaryn jetildirýge arnalǵan zańdar qabyldanýda. Shaǵyn jáne orta biznesti qoldaý, qorshaǵan ortany qorǵaý, sybailas jemqorlyqpen kúres baǵyttary da basty nazarda. Sonyń bárin halyqqa jetkizip, ár zańnyń máni men mańyzyn túsindirý isinde jýrnalisterdiń róli erekshe», – dedi Senat tóraǵasy.
Ol qazirgidei syn-qaterler kóbeigen zamanda aqparattyń máni arta túskenin de tilge tiek etti. Soǵan bailanysty jýrnalisterge júkteletin mindettiń salmaǵy aýyr ekenine nazar aýdaryp, indet kezindegi tilshiler qaýymynyń belsendiligine toqtaldy.
«Jýrnalister qaýymynyń pandemiia kezindegi eseli eńbegin erekshe atap ótken jón. Sizder dáriger, tártip saqshylarymen birge indetpen kúrestiń aldyńǵy shebinde júrdińizder. Bul eńbekterińiz eń joǵary baǵaǵa laiyq», – dedi Máýlen Áshimbaev.
Aita keteiik, «Amanat» jáne «Týǵan el» baiqaýlary jýrnalister kúnine orai Senattyń uiymdastyrýymen ótkizildi. Qorytyndysy maýsym aiynda jariialanǵanymen eldegi epidemiologiialyq ahýalǵan bailanysty marapattaý rásimi keiinge shegerildi.
Biyl eki baiqaýǵa elimiz boiynsha 120-ǵa jýyq (118) jumys kelip tústi. Baiqaý qorytyndysyn shyǵarǵan kezde pandemiia tusynda belsendiligimen kózge túsken jýrnalister de nazardan tys qalǵan joq. Sonymen qatar internet jýrnalistika, áleýmettik jeli salalarynda eńbek etip júrgen mamandar úshin de arnaiy syilyq taǵaiyndaldy.
Odan bólek, búgin TMD Parlamentaralyq Assambleiasynyń nagradalaryn ielengen elimizge belgili jýrnalister de marapattaldy.
«AMANAT» BAIQAÝYNYŃ LAÝREATTARY:
Gran-pri – Ońǵar Toqanov, «Qazaqstan» telearnasynyń tilshisi.
Birinshi oryn – Jadyra Jolmuhametova, «Informbiýro» aqparat agenttiginiń tilshisi.
Ekinshi oryn – Laýra Túsipbekova, «Kazahstanskaia pravda» gazetiniń tilshisi.
Úshinshi oryn – Tatiana Kovaleva, «Zakon.kz» portalynyń tilshisi.
«TÝǴAN EL» BAIQAÝYNYŃ LAÝREATTARY:
Gran-pri – Azamat Qasymov, «Egemen Qazaqstan» gazetiniń tilshisi.
Birinshi oryn – «Eýraziia» birinshi arnasynyń «Senat online» telejobasynyń ujymy.
Ekinshi oryn – Mirlan Altynbek, «Habar 24» agenttiginiń tilshisi.
Úshinshi oryn – Ámirbolat Hýsaian, «Azattyq Ruhy» aqparat agenttiginiń tilshisi.
Arnaýly marapat iegerleri:
Ǵaziz Ábishev – Abishev Analytics Telegram arnasynyń avtory;
Ivan Sýhorýkov pen Roman Pavlov – «Tengrinews» internet-resýrsynyń jýrnalisi jáne beine-injeneri;
Ulpan Begalina – «Atameken business» arnasynyń tilshisi;
Aihan Sháripov – «AIQYN» gazetiniń tilshisi;
Syrym Itqulov – «Hola news» shef-redaktory;
«Ainews» jáne «Aitube.kz» internet jobalarynyń ujymdary.
