Senatorlar zeinetaqy jinaǵynyń eń tómengi jetkilikti shegin anyqtaý ádistemesin talqylady. Kezdesýge Eńbek jáne halyqty áleýmettik qorǵaý ministrliginiń, «BJZQ» AQ jáne ózge de uiymdardyń ókilderi shaqyryldy, dep habarlaidy QazAqparat.
Senattyń Qarjy jáne biýdjet komitetiniń tóraǵasy Olga Perepechina sharany asha kelip, elimiz Prezidentiniń azamattarǵa zeinetaqy jinaqtarynyń bir bóligin paidalanýǵa quqyq berý jónindegi bastamasy jurtshylyq tarapynan oń qabyldanǵanyn atap ótti.
Bul reforma jaldamaly qyzmetkerlerdiń jalaqylaryn jaryqqa shyǵarýǵa túrtki boldy, qurylys jáne oǵan bailanysty salalarǵa serpin berdi, degenmen bul turǵyn úi baǵasynyń ósýine áser etti, dep atap ótti senator.
«Senatorlardy zeinetaqy jinaǵynyń bir bóligin alyp qoiý múmkindigi máselesi árqashan tolǵandyryp keledi, óitkeni ol bizdiń otandastarymyzdyń eleýli bóligi úshin asa mańyzdy. Depýtattar korpýsy úshin qyzmet barysynda otandastarymyzdyń áleýmettik ál-aýqaty árdaiym basty orynda jáne bolashaqta da osy qaǵidattardy ustanady», - dep atap ótti Olga Perepechina.
Kezdesýdiń negizgi maqsaty – zeinetaqy jinaqtarynyń jetkiliktiliginiń eń tómengi shegin ulǵaitý yqtimaldyǵyna bailanysty jaǵdaidy túsindirý bolyp otyr.
Depýtattar Eń tómengi jetkiliktilik shegin anyqtaý ádistemesiniń jumys qaǵidalaryn túsindirý maqsatynda sarapshylarǵa saýal qoiyp otyr.
Ol týraly Eńbek jáne halyqty áleýmettik qorǵaý ministriniń orynbasary senatorlarǵa aityp berdi, al «BJZQ» AQ basshysy zeinetaqy jinaqtarynyń bir bóligin paidalanýdyń qordyń zeinetaqymen qamsyzdandyrý jónindegi mindetterin júzege asyrýǵa yqtimal áseri týraly habardar etti.
