Sýret: Senattyń baspasóz qyzmeti
Senattyń Áleýmettik-mádeni damý jáne ǵylym komitetiniń tóraǵasy Nurtóre Júsip týrizm jáne sport ministri Ermek Marjyqpaevpen kezdesti. Kezdesýge qatysýshylar týristik salany damytý, sport jáne dene shynyqtyrý salasyndaǵy memlekettik jastar saiasatyn iske asyrý, sportshylardy aldaǵy Olimpiada oiyndaryna daiyndaý, sondai-aq oiyn biznesiniń jarnamasy men nasihattaýǵa jaýapkershilikti kúsheitý máselelerin talqylady, dep habarlaidy "Ult aqparat".
Parlamentshi týrizmdi damytýǵa Senat depýtattary erekshe nazar aýdaryp otyrǵanyn atap ótti. Elimizdiń tarihi bai murasy, ulttyq ereksheligi men kórikti tabiǵaty sheteldik týristerdiń kóptep kelýine tartýǵa serpin bere alady.
«Prezident Qasym-Jomart Toqaev týrizmdi damytý máselesine udaiy nazar aýdaryp otyrady jáne serpindi jobalardy iske asyrý qajettigin atap ótken bolatyn. Alaida, bul salada áli de eleýli nátijege jete alǵan joqpyz, sondyqtan kem degende 15 iri jobanyń tizimin pysyqtaý mańyzdy ekeni daýsyz. Ol úshin sheteldik investorlar men otandyq biznesti de tartý qajet. Senatorlar ekonomikany nyǵaitý men elimizdiń damýyna osy mindetterdiń mańyzy zor dep sanaidy jáne Úkimetti osy baǵytta keshendi túrde jumys júrgizýge shaqyrady. Qajet bolǵan jaǵdaida Memleket basshysynyń tapsyrmalaryn sapaly jáne ýaqtyly oryndaýǵa baǵyttalǵan aýqymdy sharalardy kózdeitin tiisti qujattardy ázirleý kerek. Parlament osy mindetterdi iske asyrýda jan-jaqty kómek kórsetýge daiyn», - dedi Nurtóre Júsip.
Ermek Marjyqpaev óz kezeginde ministrliktiń aǵymdaǵy qyzmeti, sportshylardy halyqaralyq jarystarǵa daiyndaý men týrizm, sport jáne oiyn biznesi salasyndaǵy zańnamany jetildirý jumystary týraly aitty.
