Foto: Senattyń baspasóz qyzmeti
Senat Spikeri Máýlen Áshimbaevtyń tóraǵalyǵymen Palata Biýrosynyń otyrysy ótti. Bul týraly Senattyń baspasóz qyzmeti habarlady.
Onda depýtattar 17 qazanda bolatyn Senat otyrysynyń kún tártibin bekitti jáne Palatanyń is-sharalar josparyn iske asyrý aiasyndaǵy mindetterdi talqylady.
Otyrysty ashqan Máýlen Áshimbaev aldymen ótken aptada uiymdastyrylǵan Álemdik jáne dástúrli dinder kóshbasshylary Sezi Hatshylyǵynyń XXII otyrysy men I Jas dini liderler forýmyn qorytyndylady. Senat Tóraǵasy atalǵan is-sharalar barysynda aitylǵan usynystar men ideialardyń mańyzyna nazar aýdaryp, onyń bári 2025 jylǵy 17-18 qyrkúiekte Astanada ótetin «Dinder dialogy: bolashaq jolyndaǵy sinergiia» taqyrybyna arnalǵan Álemdik jáne dástúrli dinder kóshbasshylarynyń VIII Seziniń paneldik sessiialarynda eskeriletinin tilge tiek etti.
Sonymen qatar senatorlar Palatanyń is-sharalar josparyna sáikes osy aptada ótkiziletin kóshpeli otyrystardyń kún tártibin talqylady. Naqty aitqanda, Memleket basshysynyń «Ádiletti Qazaqstan: Zań men tártip, ekonomikalyq ósim, qoǵamdyq optimizm» atty Qazaqstan halqyna Joldaýyn iske asyrý sheńberinde memlekettik qyzmetti jetildirý, qylmystyq jolmen alynǵan kiristerdi jylystatýdy zańdastyrýǵa jáne terrorizmdi qarjylandyrýǵa qarsy is-qimyldy kúsheitý, sondai-aq, sharýalardy janar-jaǵarmaimen jáne mineraldy tyńaitqyshtarmen qamtamasyz etý máseleleri boiynsha depýtattardyń aldaǵy jumysy sóz boldy.
Bekitilgen kún tártibine sáikes senatorlar aldaǵy beisenbide «Qazaqstan Respýblikasynyń keibir zańnamalyq aktilerine turǵyn úi saiasatyn reformalaý máseleleri boiynsha ózgerister men tolyqtyrýlar engizý týraly» zańdy qaraidy. Qujat turǵyn úi qatynastary salasyndaǵy zańnamany odan ári jetildirýdi kózdeidi.
"Zań kommýnaldyq turǵyn úi qorynan muqtaj adamdarǵa turǵyn úi berý nemese jeke turǵyn úi qorynan jergilikti atqarýshy organ jaldaǵan turǵyn úi berý, turǵyn úige jaldaý aqysynyń bir bóligin sýbsidiialaý jáne turǵyn úi jaǵdailaryn jaqsartýǵa arnalǵan taǵy basqa memlekettik qoldaý sharalaryn belgileidi", — delingen Senattyń baspasóz habarlamasynda.
Sondai-aq Biýro otyrysynda Májilisten kelip túsken zańdar jumys úshin turaqty Komitetterge bólinip berildi.
