Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine qoǵamdyq keńesterdiń qyzmeti máseleleri boiynsha ózgerister men tolyqtyrýlar engizý týraly» zań jobasy talqylandy. Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy "Ult aqparat".
«Qoǵamdyq keńester» Memleket basshysynyń «Halyq únine qulaq asatyn memleket» tujyrymdamasyn iske asyrýdyń mańyzdy quralyna ainalyp otyr. Qoǵamdyq keńester – Úkimet tarapynan júrgizilip jatqan áleýmettik, saiasi, ekonomikalyq damý joldaryn aiqyndaýda, halyq pikirin jinaqtaýǵa múmkindik beredi. Zań jobasy boiynsha tek qana, negizgi jańalyqtarǵa toqtala keteiin. Birinshiden, zań jobasy Qoǵamdyq keńesterdi qurýdyń mehanizmderin jetildirýge jan-jaqty múmkindik beredi. Qoǵamdyq keńesterdiń qyzmetin materialdyq qamtamasyz etý máselesi endi óz sheshimin tapty. Ol – jergilikti máslihattardyń quzyryna berilip otyr», - dedi senator Baqytjan Jumaǵulov.
Ekinshiden, buǵan deiin qoǵamdyq keńester kelip túsken barlyq normativtik quqyqtyq aktilerdiń jobalaryn qaraityn. Endi bul máseleni qaraý nemese qaraýsyz qaldyrý týraly sheshimdi qoǵamdyq keńesterdiń ózderi sheshetin bolady.
Úshinshiden, mańyzdy ózgeristerdiń biri – Qoǵamdyq keńes músheleriniń quqyqtary men mindetterin keńeite otyryp, olardy Kvazimemlekettik sektor jumystaryna, satyp alý komissiialarynyń jumysyna tartý kózdelgen. Bul normalar kvazimemlekettik sektordyń ashyqtyǵyn, eseptiligin qamtamasyz etedi.
Tórtinshiden, qoǵamdyq keńester qyzmetiniń máseleleri jónindegi «ýákiletti organ» belgilendi. Oǵan birqatar fýnktsiialar – zańnamalyq túrde berildi.
Besinshiden, jyl saiyn Memleket Basshysyna qoǵamdyq keńesterdiń qyzmeti týraly Ulttyq baiandama ázirlep, engizedi. Bul qoǵamdyq keńesterdiń jaýapkershiligin kóteredi, ashyqtyǵyn qamtamasyz etedi.
Depýtattyń aitýynsha, atalǵan baptardyń barlyǵy da qoǵamdyq keńester qyzmetin júieleýge, damytýǵa múmkindik beredi.
Májilis maquldanǵan zań jobasyn talqylaý barysynda Senat komiteti Ulttyq ál-aýqat qory men Ulttyq ál-aýqat qory tobyna kiretin ulttyq kompaniialar qurǵan Qoǵamdyq keńesti qurý jáne onyń qyzmetin uiymdastyrý tártibin naqtylaýǵa qatysty birqatar usynystar engizdi.
«Bul turǵydan alǵanda zań jobasyn qoldaýlaryńyzdy suraimyn. Sonymen birge, Áleýmettik-mádeni damý jáne ǵylym komitetiniń jumys tobynda, Komitettiń keńeitilgen otyrysynda, zań jobasyn talqylaý kezinde depýtattardan Ulttyq ál-aýqat qorynyń jáne Qor tobyna kiretin kompaniialardyń erekshelikterin eskere otyryp, Qoǵamdyq keńesin qalyptastyrý tártibin naqtylaý jáne reglamentteý maqsatynda birqatar ózgerister men tolyqtyrýlar usynyldy», - dedi B. Jumaǵulov.
Baiandalǵandy eskere kele, Áleýmettik-mádeni damý jáne ǵylym komiteti «Qazaqstan Respýblikasynyń keibir zańnamalyq aktilerine qoǵamdyq keńesterdiń qyzmeti máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń jobasyna ózgerister men tolyqtyrýlardy Parlament Májilisine jiberýdi usyndy.
Jalpy otyrys barysynda senatorlar bul usynysqa qoldaý bildirdi.
