Senator Murat Baqtiiaruly elimizdiń Premer-Ministriniń atyna joldaǵan depýtattyq saýalynda Qazaqstanda kedeilik pen jumyssyzdyq deńgeiin esepteý kezinde ashyqtyq pen ádildik qaǵidattaryn engizý qajettigi týraly máseleni kóterdi, dep habarlaidy QazAqparat.
Senatordyń aitýynsha, qazirgi kózqaras pen mundai statistikanyń nátijeleri senimdi emes.
«Jergilikti atqarýshy organdar, Úkimet jumyssyzdyq pen kedeishilik deńgeiin únemi tómen kórsetýmen keledi. 2021 jyly Úkimet elde 450 myń adam jumyssyz dep kórsetse, kedeishilik deńgeii 4,5 % aspaidy degen resmi aqparat berdi. Osy shyndyqqa sáikes kele me? Sondyqtan da Úkimet birinshi kezekte kedeishilikpen kúresýdiń jańa júiesin jasaý kerek. Keleshekte jalǵan statistikadan tolyqqandy arylý kerek», - dedi senator óz sózinde.
Murat Baqtiiaruly keide Úkimetten Parlamentke «shiki» keletin zań jobalaryn jazý salasyndaǵy problemalarǵa da toqtaldy. Senator sondai-aq Úkimet zań jobalaryn memlekettik tilde daiyndaýy kerek ekenin atap ótti.
Sonymen qatar memlekettik organdardyń Úkimettiń depýtattyq saýaldarǵa jaýap berýge degen kózqarasyn synǵa aldy.
«Senattaǵy áriptester tarapynan qoǵamda ár túrli salaǵa qatysty depýtattyq saýaldar Úkimet basshysyna, Úkimet múshelerine joldanyp jatady. Biraq olardyń bergen jaýaptary naqty emes, ekiushty bolyp keledi. Sondyqtan da depýtattyq saýaldarǵa bir japyraq qaǵazben qaitaratyn jaýaptardy doǵarý kerek. Depýtat saýalyna jan-jaqty zerdelep jaýap berý jolǵa qoiylsa», - dedi ol.
