Parlament Senatynyń jalpy otyrysynda «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasy birinshi oqylymda maquldandy, dep habarlaidy QazAqparat.
«Búginde beibit jinalystar men mitingiler ótkizý tártibi týraly» qoldanystaǵy Zańnyń qabyldanǵanyna 25 jyl ótti. Osy jyldar ishinde elimizdiń áleýmettik-ekonomikalyq salasynda úlken ózgerister boldy. Memleket basshysy Qazaqstan halqyna Joldaýynda atap ótkendei, elimizdiń qoǵamdyq-saiasi ómirin jańǵyrtpai, ekonomikalyq reformalardy tabysty júzege asyrý múmkin emes.
Qoǵamnyń suranysyna sáikes, beibit jinalystar arqyly óz ustanymyn bildirý úshin azamattardyń múmkindikterin aitarlyqtai keńeitý qajettigi paida boldy»,- dedi QR Aqparat jəne qoǵamdyq damý ministri Dáýren Abaev.
Onyń sózine qaraǵanda, sondyqtan másele qoldanystaǵy zańǵa ózgerister engizý týraly ǵana bolyp otyrǵan joq, bul barlyq beibit jinalys túrlerin uiymdastyrý men ótkizý máselelerin retteitin tujyrymdamalyq turǵydan jańa zań jobasy qamtyp otyr.
«Biz AQSh, Ulybritaniia, Frantsiia, Aýstraliia, Japoniia, Singapýr, Shvetsiia jáne Resei siiaqty elderdiń osy atalǵan saladaǵy zańnamalaryn muqiiat zerdeledik. Halyqaralyq tájiribege sáikes, álemniń kóptegen elderi beibit mitingini uiymdastyrý jáne ótkizýde basty basymdyqty qoǵamdyq qaýipsizdikke beredi. Biz qoǵamdyq pikirdi, sonyń ishinde áleýmettik jelilerdi zerdeledik, áleýmettik zertteýler júrgizdik», - dedi ministr.
Zań jobasynyń negizgi erejelerine toqtalǵan ministr, birinshiden, beibit jinalystardyń negizgi qaǵidattary zańnamalyq deńgeide engizilýde. Osy oraida zorlyq-zombylyqsyz sipat; zańdylyq; memlekettik qaýipsizdikti, qoǵamdyq tártipti, densaýlyq saqtaýdy, basqa adamdardyń quqyqtary men bostandyqtaryn qorǵaýdy qamtamasyz etý; qatysý eriktiligi eskerilgen.
Ekinshiden, zań jobasyna túsinik apparatyn engizý. Qazirgi qoldanystaǵy zańnyń kemshiliginiń biri – beibit jinalys nysandary naqty reglamenttelmegen. Osyǵan bailanysty zań jobasynda túsinik apparatyn engizý usynylady. Bul miting, piketteý, jinalys, demonstratsiia, sherý siiaqty negizgi uǵymdardy qalyptastyrýǵa jáne olardy ózara ajyratýǵa múmkindik beredi.
Qujatta beibit jinalystardy mamandandyrylǵan oryndarda ótkizý qarastyrylǵan. Beibit jinalystar ótkizetin arnaiy oryndardy jergilikti ókildi organ belgileidi. Mundai oryndarǵa birqatar talaptar qoiylǵan. Mysaly, qala men aýyldardyń ortalyǵynda bolýy, beibit jinalystyń maqsatyna qol jetkizýge múmkindikter jasalýy, uiymdastyrýǵa yńǵaily bolýy, uiymdastyrýshy men qatysýshylardyń infraqurylym nysandaryn paidalaný múmkindiginiń bolýy, sanitarlyq normalar men erejelerdiń saqtalýy, beibit jinalysty uiymdastyrýshy men qatysýshylardyń jáne basqa da adamdardyń qaýipsizdigi qamtamasyz etilýi tiis.
Sonymen qatar, búgingi jalpy otyrysta «Qazaqstan Respýblikasynyń keibir zańnamalyq aktilerine Qazaqstan Respýblikasynda beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrý engizý týraly» ilespe zań jobasy da birinshi oqylymda maquldandy.
