Senat depýtattary zeinetaqy jinaqtarynyń bir bóligin salymshylardyń paidalaný múmkindikterin talqylady, dep habarlaidy "Ult aqparat".
Prezident Qasym-Jomart Toqaev Qazaqstan halqyna Joldaýynda Úkimetke Ulttyq bankpen birlese otyryp, biylǵy jyldyń sońyna deiin salymshylardyń zeinetaqy jinaqtarynyń bir bóligin paidalanýyna qatysty barlyq qajetti normativtik-quqyqtyq aktilerdi qabyldaýdy jáne daiyndyq jumystaryn júrgizýdi tapsyrǵan bolatyn.
Senattyń Qarjy jáne biýdjet komitetiniń tóraǵasy Olga Perepechinanyń aitýynsha, bul másele ásirese pandemiiadan ótip, el ekonomikasy baiaýlaǵan kezde asa mańyzdy ári ótkir bolyp otyr.
Depýtattar bul jańalyqtar otandyq ekonomikaǵa, onyń ishinde infliatsiiaǵa qalai áser etetini, zeinetaqy jinaqtaryn maqsatsyz paidalaný nemese shetelge áketý qaýpi qandai ekendigine de nazar aýdardy.
Otyrys barysynda zeinetaqy jinaqtarynyń bir bóligin turǵyn úi jaǵdailaryn jaqsartýǵa, emdelýge, jeke basqarýshy kompaniialarǵa berýge arnalǵan sharttarǵa qatysty kóptegen suraqtar qoiyldy.
Senatorlardy zeinetaqymen qamtamasyz etý jónindegi kepildikterdi saqtaý jáne osy saladaǵy halyqaralyq tájiribe erekshe qyzyqtyrdy.
«Meniń oiymsha, zeinetaqy jinaǵynyń bir bóligin paidalaný máselesinde azamattarymyzdyń saýattylyǵyn arttyrý – mańyzdy. Azamattarymyz alaiaqtyq shemalarǵa tartylyp ketpesi úshin biz qazir zeinetaqy aktivterin senimgerlik basqarýǵa berýdi qaraityn bolamyz. Sondyqtan bul másele muqiiat pysyqtalýy kerek. Bizdiń azamattar ózderiniń jinaqtaryn kimge beretinin jáne onyń bolashaqtaǵy qaýpi qandai ekenin túsinýi tiis», - dedi depýtat Nurlan Qylyshbaev.
Memlekettik organdardyń ókilderi salymshylardyń óz zeinetaqy jinaqtaryn paidalana alatyn sharttar men maqsattaryn egjei-tegjeili aityp berdi.
Málim etilgendei, zeinetaqy jinaqtarynyń bir bóligin paidalaný - turǵyn úi máselelerin sheshýge jáne azamattardyń densaýlyǵyn jaqsartýǵa, formaldy jumyspen qamtýdy yntalandyrýǵa, meditsinalyq qymbat qyzmetterdiń jekelegen túrlerine qoljetimdilikti qamtamasyz etýge, halyqtyń senimi men jinaqtaýshy zeinetaqy júiesiniń tartymdylyǵyn arttyrýǵa yqpal etedi dep kútiledi.
«Talqylaý nátijesinde kezdesýge qatysýshylar azamattarǵa qyzmet kórsetýdiń qoljetimdiligi men jedeldigin arttyrý jóninde ýákiletti memlekettik organdarǵa usynymdar ázirledi. Sondai-aq, zeinetaqy júiesi sýbektileri arasynda barynsha qaǵazsyz qujat ainalymyn, qyzmetterdi tsifrlandyrýdy, derektermen elektrondyq almasýdy qamtamasyz etý boiynsha jumysty jalǵastyrý usynyldy. Odan basqa, usynymdar ýákiletti institýttardy aiqyndaýǵa jáne zeinetaqy jinaqtaryn jeke qarjy kompaniialarynyń basqarýyna berý tetiginiń keibir sharttary men talaptaryn jumsartýǵa qarai qaita qaraýǵa qatysty boldy.
Otyrysqa ýákiletti memlekettik organdardyń, Qazaqstan qarjygerleri qaýymdastyǵynyń jáne BJZQ ókilderi qatysty», - dedi Senattan.
