Búgin Parlament Senaty janyndaǵy Jergilikti ókildi organdarmen (máslihattarmen) ózara is-qimyl jónindegi keńestiń otyrysy boldy, dep habarlaidy "Ult aqparat".
Onda Prezident N.Á. Nazarbaevtyń áleýmettik sala jónindegi «Jalaqysy tómen jumysshylardyń eńbekaqysyn kóbeitý úshin olardyń salyq júktemesin azaitý» týraly ekinshi bastamasyn iske asyrý barysy qaraldy.
Sharany Keńes tóraǵasy, Parlament Senaty Tóraǵasynyń orynbasary Sergei Gromov ashty. Ol óz sózinde Memleket basshysynyń áleýmettik bastamasy halyqtyń az qorǵalǵan toptarynyń ózekti máselelerin sheshýge arnalǵanyn atap ótti.
«Prezident sózi negizinen qarapaiym jandarǵa arnalyp otyr. Bul salmaqty ári aýqymdy baǵdarlama, bes bastamanyń árqaisysy birneshe milliondaǵan adamdardyń múddelerin qorǵaýǵa arnalǵan. Bárin qosqanda keminde turǵyndardyń jartysy Prezidenttiń áleýmettik baǵdarlama aiasynda qamtylady», - dedi Senat Tóraǵasynyń orynbasary.
Onyń sózinde Qazaqstan qazirdiń ózinde tómen mólsherdegi salyq salatyn memleket ekeni atalyp ótildi. Sonymen birge, S. Gromovtyń aitýynsha, eńbekaqysy tómen adamdarǵa salyq aýyrtpalyǵyn 1 paiyzǵa deiin 10 ese azaitý – bul memleket tarapynan jasalyp otyrǵan aýqymdy shara, onyń aiasynda 2 millionnan astam adam qamtylady.
Ekinshi bastamany iske asyrý jónindegi memlekettik organdardyń jumysy týraly ulttyq ekonomika ministriniń birinshi orynbasary Rýslan Dálenov baiandady. Ol tiisti memlekettik organdar «Atameken» Ulttyq kásipkerler palatasymen birlese otyryp, eńbekqysy tómen jumysshylarǵa salyq salýdyń ońtaily tetikterin aiqyndaǵany týraly habardar etti. Zańnamaǵa tiisti túzetýler ázirlenip, «Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly» zań jobasyna engizildi.
Eńbek jáne halyqty áleýmettik qorǵaý ministriniń orynbasary Svetlana Jaqypova depýtattarǵa eńbekaqysy tómen adamdar týraly statistikalyq derekterdi tanystyrdy. Onyń málimetteri boiynsha, mindetti zeinetaqy jarnalaryn tóleitin 5,8 million adamnyń aiyna ortasha kirisi 60 myń teńge, 2,2 million adam odan da tómen alady. Ministr orynbasarynyń aitýynsha, aýyl sharýashylyǵy, bilim berý, densaýlyq saqtaý, áleýmettik qorǵaý, kóterme jáne bólshek saýda sekildi salalardaǵy jaldamaly qyzmetkerlerdiń úlesi joǵary bolyp otyr.
Talqylaýǵa Senat jáne jergilikti máslihat depýtattary, múddeli mekemelerdiń ókilderi qatysty.
