Búgin Senatta Qazaqstan Respýblikasynyń shet memlekettermen jáne halyqaralyq uiymdarmen qatynastaryndaǵy syrtqy saiasi jáne ekonomikalyq biryńǵai baǵyty men investitsiialyq saiasatty qamtamasyz etý máseleleri talqylandy, dep habarlaidy QazAqparat.
Senattyń baspasóz qyzmetinen málim etkendei, palata tóraǵasynyń orynbasary Asqar Shákirovtiń tóraǵalyq etýimen Senattyń Halyqaralyq qatynastar, qorǵanys jáne qaýipsizdik komiteti músheleri Syrtqy ister ministriniń orynbasary Aqan Rahmetýllinmen kezdesti.
«Búginde álemdegi geosaiasi ahýaldyń kúrt ózgerýine jáne buryn-sońdy bolmaǵan qaýip-qaterge bailanysty Memleket basshysynyń syrtqy ister ministrligi alqasynyń keńeitilgen otyrysynda, sondai-aq onyń sońǵy ýaqyttaǵy baǵdarlamalyq sózderinde alǵa qoiǵan mindetterdi buljytpai oryndaýy asa mańyzdy bolyp otyr», - dep atap ótti A.Shákirov.
Syrtqy ister ministriniń orynbasary Aqan Rahmetýllin senatorlardy syrtqy saiasattyń negizgi baǵytymen jáne maqsat-mindetterimen, sondai-aq eldiń qazirgi basymdyqtarymen tanystyrdy.
A.Rahmetýllin atap ótkendei, táýelsizdik tańynda qalanǵan Qazaqstannyń saiasi baǵytynyń bazalyq qaǵidatyndaǵy syrtqy saiasattyń sabaqtastyǵy saqtalyp keledi jáne tiimdiligi ýaqytpen dáleldengen teńgerimdilik, pragmatizm jáne ulttyq múddelerdi qorǵaýǵa negizdelip otyr.
Táýelsizdikti, halyqaralyq jáne óńirlik yntymaqtastyq pen qaýipsizdikti nyǵaitýǵa baǵyttalǵan daǵdyly syrtqy saiasi baǵyt ta damýdyń ekonomikalyq vektoryna baǵyttalatyn bolady. Bul el ekonomikasyna sheteldik tikelei investitsiia tartý, sondai-aq tariftik jáne tariftik emes kedergilerdi azaitý arqyly qazaqstandyq eksportqa syrtqy naryqty keńeitý sharalaryn kúsheitýge múmkindik beredi.
Komitet tóraǵasy Muhtar Qul-Muhammed kezdesýdi qorytyndylai kelip, pandemiiadan keiingi qalpyna keltirý problemalary Qazaqstannyń aldyna jańa maqsattar men mindetter qoiatynyn atap ótti. Bul kópjaqty jáne ekijaqty diplomatiiany damytý men jahandyq ekonomikalyq daǵdarystyń saldaryn eńserýge qatysty bolyp otyr. Ol úshin qabyldanatyn sheshimniń jedeldigi, tiimdiligi jáne resýrstardy tiisinshe paidalaný mańyzdy bolady.
Senatorlar otyrys barysynda syrtqy saiasattyń ózekti máselelerin, onyń ishinde halyqaralyq uiymdarda qazaqstandyq kadrlardyń ornyn basý, halyqaralyq sharttarǵa monitoring jasaý máselelerin kóterdi.
