Búgin Parlament Senaty Halyqaralyq qatynastar, qorǵanys jáne qaýipsizdik komitetiniń depýtattary koronavirýs pandemiiasy kezinde halyqty dári-dármekpen qamtamasyz etý jáne gýmanitarlyq kómekti bólip, taratý máselesi boiynsha densaýlyq saqtaý, syrtqy ister, qarjy ministrlikteriniń jáne taǵy basqa múddeli vedomstvolardyń basshylarymen video-konferentsiia formatynda kezdesý ótkizdi, dep habarlaidy "Ult aqparat".
Memleket basshysy Qasym-Jomart Toqaev 10 shildede ótken Úkimettiń keńeitilgen otyrysynda indettiń Qazaqstanǵa tigizgen zardabynyń sebepterine toqtalyp, onyń aldyn alýdyń naqty sharalaryn anyqtap bergen bolatyn.
Is-sharaǵa qatysqan Senat tóraǵasynyń orynbasary Asqar Shákirov qazirgi tańda depýtattar jumystaryn óńirlerde jalǵastyryp jatqanyn, bul óz kezeginde elimizde qalyptasqan ahýaldy naqty baǵalaýǵa múmkindik beretinin aitty.
«Senat depýtattary densaýlyq saqtaýǵa qatysty máselelerdi baqylaýda ustap otyr jáne árdaiym qajetti kómek kórsetýge daiyn. Azamattardyń ómirine qaýip tóndirgen aýyr jaǵdaidan keiin de bir ai ýaqyt ótti. Endi qaityp ondai olqylyqtarǵa jol berýge bolmaidy», – dedi Senattyń vitse-spikeri Asqar Shákirov.
Sonymen qatar, kezdesýde shet memleketterden kelgen gýmanitarlyq kómekti qabyldaý, bólý jáne qajettilikke qarai olardyń quramy keńinen talqylandy. Bul másele boiynsha elimizdiń Syrtqy ister ministrligimen úilesimdi jumys isteý usynyldy. Depýtattardyń óńirlerdegi saparlary jalǵasyp jatqany eskerilip, qatysýshylar aldaǵy ýaqytta birlese jumys isteý jóninde ortaq mámilege keldi.
