Foto: senate.parlam.kz
QR Parlamenti Senatynyń depýtattary Nurlan Beknazarov, Nurtóre Júsip jáne Aigúl Qapbarova «Ońtústik» arnaiy ekonomikalyq aimaǵynda bolyp, «ONTUSTIK» óńirlik telearnasynyń, №11 qalalyq aýrýhananyń jáne «Bal Tekstil» JShS ujymdarymen kezdesti. Kezdesýge qatysýshylar atom energetikasyn damytýdyń keleshegin, onyń áleýetin jáne Qazaqstannyń energetikalyq bolashaǵy men qaýipsizdigine qosatyn eleýli úlesin talqylady.
Senatorlar iadrolyq baǵdarlamasyn damytýǵa qajetti bai ýran qory bar Qazaqstanǵa atom energetikasynyń paidasy týraly aitty. Bul jer qoinaýynan alynatyn otyndarǵa táýeldilikti azaitýǵa jáne energetika salasyn ártaraptandyrýǵa kómektesedi. Parlamentshiler atom energetikasy turaqty jáne senimdi elektr energiia kózin qamtamasyz ete alatynyn atap ótti. Ol ásirese, ónerkásipte jáne ekonomikalyq ósip-órkendeý kezinde energiiaǵa ósip kele jatqan suranysty qanaǵattandyrýda asa mańyzdy. Nurlan Beknazarov ekonomikanyń turaqty damýy jáne resýrstyq ekonomikadan joǵary tehnologiialyq indýstriiaǵa kóshý úshin senimdi bazalyq energiia qajet ekenin jetkizdi.
«Qazirgi zamanǵy reaktorlardyń negizgi ereksheligi – syrtqy jáne ishki tótenshe jaǵdailarda qondyrǵynyń turaqtylyǵyn joǵary deńgeide qamtamasyz etetin belsendi jáne passivti qaýipsizdik júieleriniń úilesim tabatyny. Sonymen qatar, radioaktivti qaldyqtarmen jumys jónindegi qoldanystaǵy zańnamada atom elektr stantsiialary men basqa da salalarda, onyń ishinde meditsina, ónerkásip jáne ǵylymi zertteýlerde olardy qaýipsiz saqtaýǵa qoiylatyn talaptar naqty rettelgen», - dedi Nurlan Beknazarov.
Nurtóre Júsip óz kezeginde aldaǵy jalpyhalyqtyq referendým memleket úshin ǵana emes, búkil Qazaqstan halqy úshin salmaǵy zor sheshim qabyldaýdyń sheshýshi sáti bolatynyn atap ótti.
«Aldaǵy referendýmnyń nátijesi elimizdiń odan ári damýynyń kilti bolmaq. Atom elektr stansasyn salý – elektr energiiasynyń turaqty kózimen qamtamasyz etýdiń joly ǵana emes, sonymen qatar sabaqtas salalardy: zamanaýi tehnologiiany, qurylys, ǵylym men bilim berýdi damytýdyń qýatty katalizatory. Onyń elimizge energiia tapshylyǵy jaǵdaiyn jaqsartýǵa jáne energiiaǵa táýeldilikti azaitýǵa múmkindik beretinin túsiný mańyzdy. Atom elektr stantsiiasynyń qurylysy osy joldaǵy mańyzdy qadamdardyń biri bolýy tiis», - dedi Nurtóre Júsip.
