Búgin Senattyń jalpy otyrysynda depýtat Muhtar Jumaǵaziev elimizdiń Premer-ministri Álihan Smaiylovtyń atyna saýal joldap, kádege jaratý jinaǵy alymyna qatysty birqatar problemalardy atady, dep habarlaidy QazAqparat.
Ol saýalynda depýtattardyń óńirlerge sapary kezinde senatorlarǵa kádege jaratý alymynyń joǵary mólsherine bailanysty azamattardan birneshe ret shaǵym túskenin atap ótti.
Senator jeńil kólikterdiń kádege jaratý alymynyń mólsheri 400 myń teńgeden 3,5 mln teńgege deiin, al júk kóligi men aýyl sharýashylyǵy tehnikasyna 14 mln teńgege jetetinin aitty.
Bul shetelden importtalatyn, sondai-aq Qazaqstanda óndiriletin aýyl sharýashylyǵy tehnikasynyń aitarlyqtai qymbattaýyna alyp keldi.
«Kádege jaratý alymy is júzinde aýyl sharýashylyǵy eńbekkerlerine qosymsha salyqqa ainaldy. Tehnikany ákelý kezinde fermerge tehnika qunynyń 25-30 paiyzyna teń somada bastapqy jarnany jáne kádege jaratý alymyn tóleýge týra keledi. Máselen, traktorlar boiynsha ortasha alym mólsherlemesi 11 mln teńgege deiin, al kombaindar boiynsha ár danasyna 22 mln teńgege deiin jetedi, bul aýyl sharýashylyǵy taýaryn óndirýshilerge qosymsha qarjy júktemesi bolyp otyr», - dedi Jumaǵaziev.
Fermerlerge ózekti bolyp otyrǵan taǵy bir másele – eski tehnikany kádege jaratý úshin jeńildik sertifikatynyń mólsheri.
Senator kombaindy kádege jaratý alymy 75-80 mln teńge baǵasymen 9 mln teńgeni quraitynyn, al jeńildik sertifikatynyń mólsheri tek 2 mln teńgeni nemese tehnika qunynyń 2,5 paiyzyn quraitynyn aitty.
Osyǵan bailanysty Muhtar Jumaǵaziev jeńildik sertifikatynyń kólemin ulǵaitýdy usyndy.
«Aýyl sharýashylyǵynyń tehnikasy 80 paiyzǵa deiin tozǵan jaǵdaida kádege jaratý alymynyń qoldanystaǵy normalary otandyq fermerlerge jáne jalpy aýyl sharýashylyǵyna eleýli zalal keltiretini anyq. Nátijesinde azyq-túlik ónimderi men olardy óndirýge tehnologiialyq qatysy bar taýarlar men qyzmetterge baǵa ósip barady», - dep atap ótti ol.
Senator qalyptasqan jaǵdaiǵa bailanysty qazaqstandyqtar is júzinde sapaly, zamanaýi avtomobilder men ónimdiligi joǵary aýyl sharýashylyǵy tehnikasyna qol jetkizý múmkindiginen aiyryldy dep sanaidy.
Depýtat Úkimet basshysyna kádege jaratý alymynyń mólsherin tómendetý, balamasynyń bolmaýyn eskere otyryp ekologiialyq importtyq aýyl sharýashylyǵy tehnikasyna kádege jaratý alymyn alyp tastaý, júk kóligi men aýyl sharýashylyǵy tehnikasy úshin kedendik bajdarǵa ýaqytsha moratorii engizý máselelerin qaraýdy usyndy.
