Senator Andrei Lýkin otandyq taýarlardy akkreditteý jáne sertifikattaý júiesin jaqsartý jóninde Premer-Ministrge depýtattyq saýal joldady, dep habarlaidy "Ult aqparat".
Depýtat keibir qazaqstandyq ónim óndirýshiler sapasy tómen, paidalaný qaýipti ónim shyǵaratynyn aitady. Ol bir kompaniianyń teledidarlar óndirisine «made in kz» sertifikat alǵanymen is júzinde daiyn tehnikany satyp alǵany týraly mysal keltirdi. Aitýynsha, «Ulttyq akkreditteý ortalyǵy» JShS men akkreditteýdegi 46 sýbektiniń tekserý qorytyndysy boiynsha uiymdarǵa 15 myńnan astam zańsyz sertifikat pen 1 700 deklaratsiia bergeni anyqtalǵan. Olardyń negizinde elge 11 mlrd teńgege jýyq somaǵa 600 myńnan astam taýar ákelingen.
«2019 jyly Almaty qalasynyń «Atameken» óńirlik kásipkerler palatasy «LG Elektroniks Almaty Qazaqstan» AQ-na 58 myń dana teledidar daiyndaýǵa «CT-KZ» sertifikatyn berdi. Alaida kompaniia Ońtústik Koreiada daiyn bólshekterdi satyp alyp, otandyq ónim retinde satyp kelgen», - deidi depýtat.
Senator bul sertifikattar otandyq kásiporyndardy memlekettik qoldaý quraly retinde ákelinetin jinaqtardy kedendik bajdar men salyqtardy tóleýden bosatýǵa, memlekettik satyp alý kezinde qosymsha preferentsiialar men basymdylyqqa múmkindik beretinin atap ótti. Al kúmándi sapadaǵy taýarlar tutynýshylar men jalpy naryq úshin eleýli qaýip tóndiredi.
«Búgin de ishki naryqtyń jartysy qaýipti, sapasyz, onyń ishinde sertifikattalmaǵan ónimmen toltyrylyp, kúrdeli jaǵdai qalyptasýda. Talapqa sai kelmeitin ónimderdi ákelýge jol bermeý úshin Qazaqstannyń memlekettik baqylaý júiesi aldyn alý sharalaryn qoldanýǵa múmkindik bermeidi. Ahýaldy jaǵdaidy jaqsartý úshin qaǵaz qujat ainalymyn boldyrmai, sáikestikti rastaýdyń barlyq protsesterin tsifrlandyrý kerek. Sondai-aq akkreditteý jónindegi jumystardyń barlyq kezeńin, akkreditteý, sertifikattaý jáne tehnikalyq retteý máseleleri boiynsha akkreditteý sýbektileri men ózge de múddeli tulǵalardyń ótinishterin aiqyndaýdy jáne qadaǵalaýdy qamtamasyz etýge múmkindik beretin elektrondyq platformany ázirleý qajet», - deidi Lýkin.
