Jumyrtqa men qus etiniń qymbattaýynyń negizgi sebepteriniń biri – jem-shóptiń qymbattaýy bolyp otyr.
Senat depýtaty Sultan Dúisembinov osy máseleni sheshý joldaryn Premer-Ministrdiń atyna joldaǵan saýalynda kóterdi, dep habarlaidy "Ult aqparat".
Onyń aitýynsha, keiingi kezeńde kóptegen jem-shóp túrleri 1,5-2 ese qymbattaǵan. Sonymen qatar Qazaqstan shetelden asyl tuqymdy qustardy, únemi qymbattap bara jatqan dárýmendik qospalar men basqa da kerek-jaraqty satyp alýǵa májbúr.
«Sońǵy ýaqytta qus ónimderiniń baǵasy turaqty túrde ósip keledi. Onyń taǵy bir sebebi, qus etiniń negizgi bóligi Resei men Belarýs elinen ákelinedi. Sonymen qatar bizde qus tuqymdary joq. Olardy shetelden aldyrýǵa májbúr. Odan bólek tiisti qural-jabdyqtar men qajetti dárýmender de ózge elden keledi. Bizde jem-shópten basqa eshteńe joq deýge de bolady», - dedi senator.
Baǵanyń ósýine ákeletin máselelerdi sheshý úshin qus ósirýshilerge memleket tarapynan qoldaý qajet.
Sultan Dúisembinov keibir otandyq qus fabrikalary qazir jabylý aldynda turǵanyn atap ótti. Senator osyǵan bailanysty sala kásipkerleri úshin Úkimet laiyqty jaǵdai jasaýy tiis dep sanaidy.
«Olardyń ishinde 5 jylǵa nesie kanikýlyn uiymdastyrýǵa járdemdesý, saqtandyrý syiaqylary jarnasyn sýbsidiialaý jáne asyl tuqymdy qusty satyp alý, jem-shóp qoryn qurý, ákimshilik tosqaýyldardy joiý jáne josyqsyz básekelestikten qorǵaý bar», - dedi Sultan Dúisembinov.
