Foto: Bestnews.kz
Andrei Lýkin óziniń depýtattyq saýalynda Iadrolyq ǵylym ortalyǵy bolyp tabylatyn Kýrchatov qalasynyń problemalary týraly aitty, dep habarlaidy Ult.kz Senattyń baspasóz qyzmetine silteme jasap.
Tozyp bitken infraqurylym, turǵyn úi-kommýnaldyq sharýashylyqtaǵy jumys júiesiniń joqtyǵy, densaýlyq saqtaý men bilim berý deńgeiiniń tómendigi, mamandar men jabdyqtardyń jetispeýshiligi osy qalaǵa tán bolyp otyr.
«Sapar aiasynda komitet músheleri qala ákimimen jáne máslihat depýtattarymen kezdesti. Olar eldiń ekonomikalyq, áleýmettik jáne mádeni ómiriniń ortalyqtarynan alys ornalasqan shaǵyn qalalarǵa tán, qalanyń áleýmettik-ekonomikalyq máseleleri aýqymyn belgiledi. Ondaǵy problemalar adamdardy osy qaladan ketýge májbúr etedi. Sońǵy jyldary kóshi-qon kórsetkishinde teris saldo baiqalyp otyr. Atap aitqanda, Iadrolyq ortalyqta kadrlardyń turaqtamaýy kóbeiip barady. Ol joǵary bilikti kadrlardyń ketýine dýshar etedi. Bul Kýrchatovtaǵy ǵylym men óndiristiń damýyn shekteidi», - dep atap ótti senator Lýkin.
Senator Kýrchatov qalasy men Iadrolyq ortalyq nysandaryn kórip shyǵýdyń nátijesi boiynsha qalaǵa ǵylym qalashyǵy mártebesin berýdi usyndy. Bul bir jaǵynan, otandyq ǵylym ortalyǵyn qoldaýǵa múmkindik beredi, ekinshi jaǵynan, qalanyń infraqurylym máselelerin sheshýge járdemdesedi.
«Kýrchatov qalasyna ǵylymi qalashyq mártebesin berý máselesi kóptegen jyldar boiy kóterilip keledi. 2012 jyly Premer-Ministrdiń ókimimen ǵylym qalashyǵy týraly zańnamany ázirleý boiynsha usynys daiyndaý maqsatynda jumys toby qurylǵan bolatyn. Sonymen qatar, «Kýrchatov ǵylymi qalashyǵy» klasteriniń tujyrymdamasy jáne «Ǵylymdy qajet etetin aýmaqtar týraly» zań jobasy da ázirlendi. Shyn máninde, Kýrchatovtyń ǵylymi qalaǵa ainalýyna barlyq negiz bar, biraq másele búgingi kúnge deiin sheshilgen joq. «Ǵylym týraly» arnaiy zańnyń qabyldanýy Kýrchatov qalasynyń ózin de, onda ornalasqan ǵylymi ortalyqtardy da damytýǵa qýatty serpin beredi dep senemiz. Osylaisha, elimizdiń Prezidenti Qasym-Jomart Toqaevtyń Qazaqstan halqyna Joldaýynda aitylǵan «monoqalalarǵa dem berý» jáne «óńirlerdi belsendi damytý» týraly tapsyrmasyn oryndaýǵa múmkindik beredi», - dedi senator Lýkin.
