Senat depýtaty Murat Baqtiiaruly QR Premer-ministri Baqytjan Saǵyntaevqa joldaǵan saýalynda kópbalaly jáne turmysy tómen otbasylar máselesin kóterdi, dep habarlaidy Baq.kz agenttigi.
Depýtattyń aitýynsha, bundai januialardaǵy árbir balaǵa kámelettik jasqa jetkenshe eń tómengi jalaqynyń 50 paiyzy kóleminde járdemaqy tóleý múmkindikterin qarastyrý kerek. Sonymen qosa, olardyń turǵyn úi máselesin sheshý qajet.
«Kópbalaly jáne turmysy tómen otbasylardy áleýmettik qorǵaý máselesi sońǵy aptalarda jurtshylyqtyń eń kóp talqylap jatqan taqyryptarynyń birine ainaldy. Elbasy tapsyrmasyna sáikes, Úkimet janynan halyqtyń tabysyn arttyrý jáne turmysyn jaqsartý baǵytynda usynystar ázirleý jóninde jumys toby da quryldy. Biz buny quptaimyz. Resmi málimetke súiensek, elimizde 340 myńnan astam kópbalaly otbasy tirkelgen. Onyń 237 myńy - Altyn alqa men Kúmis alqa ieleri. Sonymen birge, 85 myń múgedek bala, 400 myńǵa jýyq balalary bar, biraq asyraýshysy joq ne odan airylǵan jalǵyzbasty analar bar. Sondyqtan da, Úkimet Altyn alqa, Kúmis alqa bar analardyń, asyraýshysy joq analardyń, múgedek áielderdiń, múgedek balasy bar analardyń, áleýmettik-turmystyq ál-aýqatyn kóterý úshin árbir balaǵa kámelettik jasqa jetkenshe eń tómengi jalaqynyń 50 paiyzy kóleminde járdemaqy tóleý múmkindikterin qarastyrý kerek», - dedi Senat otyrysynda Murat Baqtiiaruly.
Onyń aitýynsha, Qazaqstanda kóptegen damyǵan elderdegi siiaqty kópbalaly otbasyn qoldaý jáne járdemdesý maqsatynda «Úlken otbasy» arnaiy memlekettik baǵdarlamasy qabyldanýy tiis.
«Memlekettik ataýly áleýmettik kómekti taǵaiyndaý barysynda otbasynda birge turatyn zeinetkerdiń, múgedektiń, stýdenttiń jáne bir jasqa deiingi bala kútimine, múgedek balany qaraǵany úshin tólenetin járdemaqy men shákirtaqy kólemin tabys kózi retinde esepke almaýdy usynamyz. Buǵan qosa, kópbalaly analar men turmysy tómen otbasylardyń Úkimettiń turǵyn úimen qamtamasyz etýge baǵyttalǵan san alýan baǵdarlamalarǵa qatysý múmkindiginiń bolmaýyna bailanysty kópshiligi qolaisyz, tar, jaldamaly oryndar men páterlerde turýǵa májbúr. Sondyqtan, olardyń úi kezektiligin bólek tirkeý sharalaryn jáne olar úshin barynsha qoljetimdi, aldyn ala jarnapulyn tólemei, jalǵa beriletin, elimizdiń barlyq qalalary men aýdan ortalyqtarynda salynatyn turǵyn úi máselesin sheshýge baǵyttalǵan júieli is-sharalar qabyldanýy tiis», - dedi depýtattardyń atynan saýal joldaǵan Murat Baqtiiaruly.
Senator elimizdegi áleýmettik turaqtylyq pen halyqty qorǵaýdy kúsheitý maqsatynda kópbalaly analar men múgedekterdi, qiyn jaǵdaida ómir súrip jatqan azamattardy qoldaýǵa baǵyttalǵan arnaiy keshendi áleýmettik baǵdarlama ázirleýdi usyndy.
