25 qazan kúni ótken Senat otyrysynda depýtat Dinar Nóketaeva Qazaqstan Respýblikasynyń Premer-Ministri B.Á. Saǵyntaevtyń atyna depýtattyq saýal joldady.
Qazaqstan Respýblikasynyń
Premer-Ministri
B.Á. Saǵyntaevqa
Qurmetti Baqytjan Ábdiruly!
Bizdiń depýtattyq saýalymyzǵa óńirlerge sapar barysyndaǵy kitaphana ujymdarymen kezdesýler jáne Búkilqazaqstandyq kitaphanashylar sezdinde kóterilgen máselelerdi taldaý nátijeleri negiz bolyp otyr.
Elbasynyń damyǵan otyz eldiń qataryna kirý týraly, sondai-aq «Bolashaqqa baǵdar: rýhani jańǵyrý» jáne «Tsifrly Qazaqstan» baǵdarlamalarynda atap ótken mindetterin oryndaý úshin qoǵamnyń turaqty damýyndaǵy jáne jeke tulǵanyń básekege qabilettiligin qalyptastyrýdaǵy kitaphanalardyń alatyn orny erekshe.
Kitaphana salasynyń aǵymdaǵy jaǵdaiyna saraptama jasai otyryp, kitaphanalar qyzmetterine keri áser etetin jáne sheshimin talap etetin birqatar júieli máseleler bar ekendigi aiqyn. Atap aitqanda, kitaphana salasynyń normativtik-quqyqtyq bazasynyń jetilmegendigi, kitaphana qoryn tolyqtyrý ózektiligi men jańarýynyń álsizdigi, respýblikanyń kitaphana salasyndaǵy bilikti mamandardyń jetispeýshiligi, kitaphana qyzmetkerleri jalaqysynyń tómendigi, kitaphanalardyń materialdyq-tehnikalyq, tehnologiialyq bazasynyń qanaǵattandyrǵysyz jaǵdaiy jáne t.b.
Osyǵan orai, kitaphanalar qyzmetiniń tájiribesin zertteý negizinde kelesi is-sharalardy júzege asyrý usynylyp otyr:
1) Qazaqstan Respýblikasyndaǵy Kitaphana isin damytý tujyrymdamasyn jasaýdyń qajettiligi;
2) Qazaqstan Respýblikasynyń «Kitaphana isi týraly» Zańyn ázirleý ózektiligi. Qazirgi tańda bar zańnamalyq jáne normativtik aktiler kitaphanalarǵa olardyń aqparattyq, mádeni jáne bilim berý qyzmetterin tolyq túrde júzege asyrýǵa múmkindik bermeidi. Arnaiy zań elimizdegi kitaphana isin damytýdy quqyqtyq retteýge, túrli deńgeidegi kitaphanalar jumystarynyń tepe-teńdigin qalyptastyrýǵa múmkindik berer edi;
3) «Tsifrly Qazaqstan» baǵdarlamasyn júzege asyrý úshin Qazaqstan Respýblikasyndaǵy barlyq kitaphana qoryn tolyq tsifrlyq túrge kóshirý qajet. Elektrondyq kitaphanany jasaý jáne qalyptastyrý barysyndaǵy tejeýshi faktorlardyń biri qazirgi avtorlardyń shyǵarmashylyqtaryn avtorlardyń nemese olardyń quqyq ielenýshileriniń ruqsatynsyz tolyq kólemde tsifrlyq formatta usynýǵa múmkindik bermeitin «Avtorlyq jáne sabaqtas quqyqtar týraly» Zańy bolyp tabylady. Osyǵan orai, atalǵan Zańǵa basylymdardy kóshirmeleý jáne tsifrlaý máseleleri boiynsha tolyqtyrýlar men ózgertýler engizilse;
4) elimizdegi kitaphanalyq-aqparattyq resýrstardy biryńǵai integratsiialanǵan júiege biriktirý qajet. Ol respýblika kóleminde aqparattyq resýrstardy, QazUEK komegimen tsifrlyq resýrstardy ashyq túrde qalyptastyrýǵa jáne paidalanýǵa múmkindik berer edi;
5) respýblikanyń zaǵip jáne nashar kóretin azamattarǵa arnalǵan arnaýly kitaphanalary qyzmetiniń modeldi standartyn jasaý. Qazirgi tańda, elimizde múmkindigi shekteýli paidalanýshylar úshin kitaphanalyq-aqparattyq qyzmet kórsetý jaǵdaiyn jasaýdyń tiisti deńgeii qarastyrylmaǵan;
6) elimizdiń kitaphanalyq qaýymdastyǵymen birlese otyryp oqýdy qoldaý jáne kitaphanalardy nasihattaý maqsatynda «Oqityn Qazaqstan» memlekettik baǵdarlamasy jasalyp júzege asyrylsa quba-qup bolar edi;
7) kitaphanalardyń qorlaryn tolyqtyrýdy memlekettik qoldaý jáne Qazaqstannyń kitap naryǵyndaǵy barlyq býyndarmen ózara árekettestik jolymen respýblikanyń óńirlik kitaphanalarynyń qorlaryn sapaly jáne der kezinde tolyqtyrý úshin ortalyqtandyrylǵan kitaphanalyq kollektor (biryńǵai ortalyq) jasaý qajettigi týyndaýda;
8) JOO men kolledjderdegi granttar sanyn arttyrý jolymen kitaphana kadrlaryn daiarlaýdy Memlekettik qoldaý óte ózekti másele. Elimizdiń kitaphanalary búgingi kúni joǵary arnaýly bilimi bar mamandardyń tapshylyǵyn sezinýde. Málimetterge sáikes, elimizdiń 11 310 kitaphanasynda 20 myńǵa jýyq qyzmetkerler jumys istese, olardyń 40%-nyń arnaýly kitaphanalyq bilimi joq bolyp tabylady. Al, Bilim jáne ǵylym ministrligi 2018-2019 oqý jylyna «Kitaphana isi» boiynsha mamandardy daiarlaýǵa 70 orynǵa memlekettik tapsyrys bergen. Bizdiń oiymyzsha bul jetkiliksiz. Aqparat naryǵynda básekege qabilettilik úshin tek joǵary bilikti mamandar ǵana qajet emes, sonymen qatar úzdiksiz kitaphanalyq bilim berýdiń naqtylanǵan júiesi bolýy tiis;
9) kitaphana mamandarynyń bilikti quramynyń turaqtylyǵyn qamtamasyz etý úshin kitaphana qyzmetkerleriniń eńbekaqysyn kezeń-kezeńmen ósirý múmkindigi qarastyrylsa jáne kásip bedeli men imidjin kóterý úshin respýblikalyq kásibi mereke – «Kitaphanashy kúni» belgilense quba-qup bolar edi;
Atalǵan usynystar elimizdegi kitaphana salasynyń jetildirilýine jáne qazirgi qoǵam damýynyń irgetasy bolyp tabylatyn sapaly adam kapitalyn qalyptastyrýǵa oń nátijesin berer edi.
Qurmetti Baqytjan Ábdiruly, Sizden atalǵan usynystardy qarastyrýdy jáne qoldaǵan jaǵdaida tiisti memlekettik organdarǵa sáikesinshe tapsyrma berýińizdi suraimyz.
Qurmetpen,
Senat depýtattary
D. Nóketaeva
B. Jumaǵulov
