QR Prezidenti Qasym-Jomart Toqaevtyń 27 sáýirdegi málimdemesine qatysty Senat depýtaty Álimjan Qurtaev óz oiyn bildirdi, dep habarlaidy QazAqparat.
«Elimizdegi ahýalǵa bailanysty tótenshe jaǵdailar jónindegi komissiianyń sheshimin negizge ala otyryp, el Prezidenti Qasym-Jomart Toqaev karantin merzimin biylǵy 11 mamyryna deiin sozdy. Aitýly indet álem elderi men qosa, Qazaqstandy da dúrbeleńge salǵaly biraz ýaqyt boldy. Koronavirýspen kúres 2 jolmen júrip kele jatyr. Onyń alǵashqysy – Qytai bastaǵan biraz memleketter óz elderinde karantin jariialap, júris-turysqa tyiym salyp, virýstyń taralýyna jol bermeýde. Ekinshisi – ol Braziliia, Iran, Belarýs siiaqty elder birinshi kezekte ekonomikany saqtaimyz dep, karantin jariialamai basqa jolmen júrýde. Árine barlyǵyna ýaqyt tóreshi», - dedi Á.Qurtaev.
Senator Memleket basshysynyń el qaýipsizdigi úshin tótenshe jaǵdai rejimin sozý týraly sheshimin qoldaitynyn alǵa tartty.
«Memleket basshysy Qasym-Jomart Toqaev eldiń amandyǵy, halyqtyń densaýlyǵy bárinen joǵary dep elde karantin jariialady. Óte durys sheshim degim keledi. Karantin jariialanǵaly 45 kún bolypty, árine osynshama ýaqyt boiy úiden shyqpai otyrý ońai emes. Degenmen, memleket tarapynan halyqqa kómek, qoldaýlar kórsetilip jatyr. Onyń ishinde turmysy tómen jáne tabysyn joǵaltqan otbasylarǵa qarjylai ári azyq-túliktei kómek berilýde. Úkimet tarapynan bólingen 42 500 teńge áleýmettik qoldaý aqysyn 4 mln-nan astam adam alsa, odan bólek 1 mln-nan astam adam azyq-túliktei járdem aldy. Sonymen qatar, 1 mln 600 myń adamǵa turǵyn úi sharýashylyq shyǵyndaryn óteý kómegi kórsetildi. El ekonomikasynyń negizgi dińgegi biznes, sol sebepti iri, orta jáne shaǵyn biznesti qoldaýǵa Prezident Qasym-Jomart Toqaev 6 trillion teńge teńgege jýyq qarjy bólinip otyrǵanyn aitty. Úkimetke osy bólinip otyrǵan qarjyny tiimdi paidalaný joldaryn qaraýdy tapsyrdy», - dedi ol.
Sondai-aq, Senat depýtaty tótenshe jaǵdaidan keiingi el ekonomikasynyń damýyna alańdaýshylyq tanytatynyn bildirdi.
«El Prezidenti basa nazar aýdarǵan taǵy bir dúnie – ol karantinnen keiingi ómir. Osyǵan orai ekonomikanyń barlyq salasyna kómek, qoldaý qajet. Sebebi karantinniń saldarynan ekonomika salalary quldyrap jatyr. Aldymen ol aýyl sharýashylyǵy salasyna aýqymdy kómek kerek. Odan keiin ekonomikamyzdyń draiveri sanalatyn qurylys salasy. Q.Toqaev 27 sáýir kúngi málimdemesinde Úkimet pen Ulttyq bankke 11 mamyrǵa deiin ekonomikany odan ári damytýdyń josparyn qurý tapsyrmasyn berdi. Memleket basshysynyń elimizde der kezinde tótenshe jaǵdai jariialap, tiisti sharalardy ýaqytyly qabyldanýynyń nátijesinde, Úkimet jaǵdaidy óz baqylaýynda ustap otyr. Biz, Senat depýtattary óz kezegimizde naqty usynystarymyzdy ázirlep jatyrmyz. Degenmen, shyǵyn joq emes bar, osy indettiń saldarynan kóz jumǵan azamattarymyz da bar. Olardyń jaqyndarynyń qaiǵysyna ortaqpyz. Al aýyryp jatqan jandardyń tez saýyǵyp shyǵýyn tileimiz», - dedi senator.
Eske sala keteiik, 27 sáýir kúni Qazaqstan Respýblikasynyń Prezidenti Qasym-Jomart Toqaev arnaiy málimdeme jasap, elimizde tótenshe jaǵdai rejiminiń 11 mamyrǵa deiin sozylatynyn aitqan bolatyn.
