Senat depýtattary azamattardyń osal sanattary úshin jeńildikti ipoteka baǵdarlamalarynyń qoljetimsiz ekenin másele etip kóterdi, dep habarlaidy "Ult aqparat".
Úkimet basshysyna depýtattyq saýal joldaǵan depýtattar balama nusqalar usynbai turyp azamattardy jalǵyz turǵyn úiinen májbúrlep shyǵarýǵa jol bermeýge Úkimettiń nazaryn aýdarýǵa tyrysty.
Naqtyraq aitqanda Senat tóraǵasynyń orynbasary Asqar Shákirov pen depýtat Lázzat Súleimen osy máselege bailanysty QR Premer-ministrine depýtattyq saýal joldady.
«Qazir úi alý kezeginde shamamen 530 myńǵa jýyq adam tur. Jyl saiyn olardyń sany taǵy 50 myń adamǵa kóbeiedi. «Nurly jer» baǵdarlamasyna kiretin «Shańyraq» qanatqaqty jobasy ákimdikterde turǵyn úi alýǵa kezekte turǵandarǵa ipotekalyq nesie berýdi kózdeidi. Nesie alý úshin otbasynyń ár múshesiniń tabysy aiyna 3,1 eselik eń tómengi kúnkóris deńgeiinen (32 668 teńge) aspaýy tiis. Ol halyqtyń tabysy az adamdarǵa arnalǵanyn kórsetedi. Zeinetaqy qorynan beriletin sońǵy alty aidyń úzindi kóshirmesi - kiristerdi rastaý nysany», - dedi Senat otyrysynda depýtattyq saýaldy oqyǵan Lázzat Súleimen.
Onyń aitýynsha osy jobany iske asyrý tájiribesi kórsetkendei, baspana osal sanattaǵy, onyń ishinde múmkindikteri shekteýli azamattar úshin qoljetimsiz bolyp otyr.
«Máselen, I jáne II toptaǵy múgedektigi bar adamdar olardyń eńbek tabysyn rastaýdyń bolmaýyna bailanysty jeńildetilgen ipotekalyq kredit ala almaidy. Bul azamattardyń ádette resmi jumysqa ornalasýǵa jáne tiisinshe zeinetaqy qoryna jarna aýdarýǵa múmkindigi joq», - dedi Lázzat Súleimen.
Depýtat sondai-aq «7-20-25» baǵdarlamasy kezek pen tirkeýsiz, biraq tabystary 3,1 eselik eń tómengi kúnkóris deńgeiinen joǵary azamattardy turǵyn úimen qamtamasyz etýge baǵyttalǵanyn atap ótti. Atalǵan baǵdarlama kóptegen qazaqstandyqtar úshin edáýir qoljetimdi bolǵanymen bastapqy turǵyn úi naryǵynda ǵana jumys isteidi.
«Sonymen birge paidalanýǵa qoldanysqa engizý sátindegi turǵyn úidi tabý, ádette óte qiyn, sebebi bastapqy turǵyn úi naryǵy páterlerdi keiinnen qaita satý úshin birneshe páterdi bir ýaqytta satyp alatyn alypsatarlar qyzmetiniń nysany bolyp otyr. Osyǵan bailanysty azamattar aldyn ala brondaý shartymen turǵyn úi satyp alýǵa jáne turǵyn úi paidalanýǵa berilgennen keiin ǵana atalǵan baǵdarlama boiynsha ipotekalyq kreditti resimdeýge májbúr bolady», - dedi Senat depýtaty.
Senatorlar májbúrlep shyǵarýǵa tyiym salý negizderiniń tizimi sapaly túrde jan-jaqty qaita qaralýy kerek ekenin, sondai-aq aldyn alý sharalaryn qabyldaý, atap aitqanda azamattardyń ipotekalyq qaryzdy tóleý jónindegi táýekelderi men múmkindikterine muqiiat taldaý júrgize otyryp, azamattarǵa ipotekalyq qaryzdar berý kezinde ekinshi deńgeili bankterdiń baqylaýyn kúsheitý qajettigin atap kórsetti.
