Búgin Parlament Senatynyń jalpy otyrysynda depýtat Andrei Lýkin eldegi aýa tazalyǵyn baqylaityn memlekettik monitoringtiń sapasyna alańdaýshylyq bildirdi. Osy oraida ol Úkimet basshysynyń orynbasary Roman Skliardyń atyna saýal joldady, dep habarlaidy "Ult aqparat".
Senator elimizdegi memlekettik ekologiialyq baqylaýdyń sapasyna kóńili tolmaitynyn jetkizdi. Onyń aitýynsha, olqylyqtar men kemshilikter júieli túrde tirkelgenine qaramastan, ekologiialyq jaǵdaiǵa monitoring tiisti deńgeide júrgizilmei keledi. Tipti lastanýdyń kózderin anyqtaý boiynsha sharalar qabyldanbai otyr jáne buzýshylyqtardy joiý, zalaldy óteý jumystary da nashar júrgizilýde.
«Sońǵy 2 jylda elimizdiń aýmaǵynda atmosferalyq aýanyń joǵary deńgeidegi lastanýy boiynsha 1296 jaǵdai tirkelgen. Sondai-aq sý qoimalarynda 934 lastaný deregi anyqtalǵan. Soǵan qaramastan lastaný kózderi anyqtalmai otyr jáne jyl saiyn 1,5 mlrd. teńge jumsalatyn qorshaǵan ortanyń jai-kúiin baqylaý materialdary da qoldanylmai keledi», – dedi Andrei Lýkin.
Senator sońǵy jyldary ziiandy óndiris oryndaryn qurý jáne keńeitý kezinde halyqtyń múddesin eskermeý faktileri jiilep ketkenine de nazar aýdardy. Andrei Lýkin eger bul jaǵdai ózgermese, elimizdiń florasy men faýnasyna aitarlyqtai qaýip tónetinin de atap ótti.
Osyǵan bailanysty senator qaýipti qaldyqtardyń ainalymyn baqylaýdy uiymdastyrý jáne olardy tolyq zalalsyzdandyrý, atmosferalyq aýanyń ekologiialyq problemalaryn jáne zańsyz karerlerdi qalpyna keltirý problemalaryn sheshý úshin táýelsiz ekologtardy shaqyra otyryp, arnaiy komissiia qurýdy usyndy.
