Senat depýtaty Murat Baqtiiaruly Baiqońyr dárigerlerine ekologiialyq tólem tóleýdi usyndy, dep habarlaidy Sputnik Qazaqstan tilshisi.
Búgin senatta Baiqońyr turǵyndaryna meditsinalyq qyzmet kórsetý týraly kelisimge ózgerister engizý týraly hattama ratifikatsiialandy. Otyrys barysynda depýtat Murat Baqtiiaruly úkimet pen densaýlyq saqtaý ministrliginiń nazaryn tez arada sheshimin tabýy tiis ózekti máselege aýdardy.
"Densaýlyq saqtaý ministriniń buiryǵy boiynsha alǵashqy meditsinalyq sanitarlyq kómek kórsetetin Qyzylorda oblysynyń densaýlyq saqtaý sýbektilerine adam basyna bekitilgen tarif aiyna 683 teńgeni quraidy. Júieli jan basyna shaqqandaǵy normativ boiynsha ambýlatorlyq-emhanalyq kómek kepildik berilgen tegin meditsinalyq kómek kólemi aiasynda respýblikalyq biýdjetten beriledi jáne onyń ishinde barlyq kommýnaldyq shyǵyn bar. Alaida Baiqońyr qalasyna kórsetiletin kommýnaldyq qyzmet Resei bekitken tarifpen tólenedi. Kommýnaldyq qyzmet quny Qyzylorda oblysynyń tarifterimen salystyrǵanda birneshe esege qymbat", — dedi senator parlamenttiń joǵary palatasynyń jalpy otyrysynda.
Murat Baqtiiarulynyń aitýynsha, gazdyń bir tekshe metri Qyzylorda oblysynda 21 teńge bolsa, Baiqońyrda — 700 teńge, iaǵni 34 ese qymbat. Al sýdyń bir tekshe metri Qyzylorda oblysynda — 95 teńge, Baiqońyrda — 479 teńge, 5 ese qymbat. Oblysta jylýdyń bir gigakaloriiasy 14 myń teńgeni qurasa, Baiqońyr qalasynda — 56,6 myń teńge. Elektr energiiasynyń 1 kilovaty — 25,3 teńge, al Baiqońyrda — 44 teńge. Kanalizatsiianyń bir tekshe metri — 159,6 teńge, Baiqońyrda 574 teńge, iaǵni úsh ese qymbat.
"Nátijesinde byltyr Baiqońyr qalasyndaǵy emhana 68 million teńge shyǵynǵa batsa, osy jyldyń qańtar-aqpan ailaryn 30 million shyǵynmen aiaqtady", — dedi depýtat.
Osy oraida Murat Baqtiiaruly densaýlyq saqtaý ministrinen Baiqońyr dárigerlerine qosymsha aqy tóleý joldaryn qarastyrýdy ótindi.
"Qurmetti Eljan Amantaiuly, Baiqońyr qalasynyń erekshe statýsyn eskere otyryp, adam basyna shaqqandaǵy normativke tiisti koeffitsent qosý joldaryn jáne emhanada jumys isteitin qyzmetkerlerdiń jalaqysyna ekologiialyq apat aimaǵyna beriletin qosymsha aqsha bólýdiń joldaryn qarastyrsańyz degen ótinish aitamyz", — dedi ol.
