Senat depýtaty Dana Nurjigit QR Bas prokýroryna depýtattyq saýal joldady, dep habarlaidy "Ult aqparat".
«Halyqaralyq tájiribeni saralap, qylmystyq zańnama qoldanysyn taldap, balalarǵa qarsy jynystyq sipatta jasalǵan qylmystyń barlyq túrine qatysty jazany qaita qarap, qatańdatý boiynsha usynystar ázirleýdi suraimyz», – dedi Dana Nurjigit Senat otyrysyndaǵy óz saýalynda.
Sondai-aq, depýtat Memleket basshysynyń osy másele boiynsha bergen tapsyrmasynyń oryndalý barysy týraly aqparat berýdi surap, bul saladaǵy halyqaralyq konventsiialarǵa qosylý jáne implementatsiialaý boiynsha zańnamalyq usynystar engizý qajettigin atap ótti.
Depýtat keltirgen statistika boiynsha, Qazaqstanda keiingi 4 jylda osyndai qylmystar úshin 1868 adam kináli dep tanylǵan. Onyń 539-y ǵana 10 jylǵa deiingi merzimge bas bostandyǵynan aiyrylǵan. Biyldyń ózinde ǵana kámeletke tolmaǵan balalarǵa qarsy jasalǵan qylmys 8 paiyzǵa ósken.
«Muny toqtatý úshin qatań jaza qylmysty jasaǵan adamǵa ǵana emes, sol qylmysqa jol bergen, faktilerdi jasyrǵan, qylmyskerdiń jaltarýyna múmkindik bergen azamattarǵa da qoldanylýy kerek dep oilaimyz», – deidi Senat depýtaty.
Sondai-aq, D.Nurjigit Qazaqstan Halyqaralyq deńgeide balalardy qorǵaityn eki mańyzdy qujatqa áli qol qoimaǵanyna nazar aýdardy. Olar: birinshi - Balalar quqyqtary týraly konventsiianyń úshinshi fakýltativtik hattamasy. Ekinshi - Eýropa Odaǵynyń balalardy seksýaldy eksplýatatsiiadan jáne seksýaldy zorlyq zombylyqtan qorǵaý konventsiiasy.
«Bul konventsiiaǵa qosylǵan memleketter balany jezókshelikke tartý, májbúrleý nemese seks-taýar retinde kórip, paidalaný, balalar pornografiiasyn óndirý, usyný, taratý, satyp alý, saqtaý úshin qylmystyq jaza qarastyrýǵa mindetti», - deidi depýtat saýalynda.
