Senat otyrysynda Áli Bektaev Premer-Ministrdiń atyna depýtattyq saýal joldady. Óz saýalynda senator «Aýyl – el besigi» jobasyn iske asyrý kezindegi ózekti problemalarǵa nazar aýdardy, dep habarlaidy "Ult aqparat".
Depýtattyń aitýynsha, jobaǵa engizilgen tirekti jáne spýtniktik eldi mekenderdi irikteý qaǵidalary túsiniksiz. Búginde bul tizimge 3561 eldi meken engizilgen. Olar negizinen aýdan ortalyqtary men olardyń ainalasyndaǵy aýyldar. Al shalǵaidaǵy eldi mekenderdiń qamtylýy nashar.
«Eń soraqysy, «Aýyl – el besigi» jobasyn daiyndaý barysynda turǵyndardy turaqty jumyspen qamtý máselesi eskerilmegen. Aýyl sharýashylyǵy ministrligi men «QazAgro» aktsionerlik qoǵamynyń qarjy institýttary osy jobadan tys qalǵan. Agroónerkásiptik keshendi damytýǵa 2019 jyly 448 milliard teńge bólindi. Onyń 1,6 milliard teńgesi ǵana aýyldarda turaqty jumys oryndaryn ashýǵa arnalǵan 22 jobaǵa jumsalǵan. Al 2020 jyly aýyldyq jerlerde ashylatyn 20 myń jumys ornynyń tek 800-i turaqty bolmaq. Bul orta eseppen ár tórt eldi mekende bir ǵana turaqty jumys orny qurylady degen sóz», – degen Á.Bektaev osy baǵyttaǵy investitsiialyq jobalardyń áleýmettik tiimdiligi tómen ekenin jetkizdi.
Senatordyń sózine qaraǵanda, bul jumystar «Nurly jol», «Nurly jer», «Eńbek», «Biznestiń jol kartasy-2025» siiaqty memlekettik baǵdarlamalarmen úilestirilmegen. Sondai-aq, aýyldardyń infraqurylymdyq problemalaryn túbegeili sheshýge arnalǵan bastamalar júieli josparlanbaǵan. Osyǵan orai senator ózin tolǵandyrǵan birqatar mańyzdy máselelerge toqtalyp ótti.
«Jobany daiyndap, iske asyrar aldynda aýyldyq eldi mekenderdiń óńirlik standarttar júiesine sáikestigin zertteitin, jergilikti turǵyndardyń ómir súrý deńgeiin anyqtaityn keshendi jumystar júrgizildi me? Osy jobaǵa engizilgen áleýeti bar 1173 tirekti, 2388 spýtniktik eldi meken qandai kriteriilermen anyqtaldy?», – delingen depýtattyq saýalda.
Sonymen qatar Á. Bektaev Úkimet basshysynan atalǵan jobany ulttyq baǵdarlama retinde qaita qabyldaýǵa jáne aýyldyq aýmaqtardy damytý saiasatyna jaýapty retinde Aýyl sharýashylyǵy ministrligin qaita bekitýge qatysty pikir bildirýin suraǵan.
