Parlament Senatynyń jalpy otyrysynda depýtat Ǵumar Dúisembaev Atyraý oblysy damý biýdjetiniń mólsherin ulǵaitý bóliginde jalpy sipattaǵy transfertterdi esepteý ádistemesin qaita qaraýdy surady. Osy oraida QR Premer-Ministri Asqar Maminniń atyna depýtattyq saýal joldady, dep habarlaidy "Ult aqparat".
Onyń sózine qaraǵanda, «Respýblikalyq jáne oblystyq biýdjetter, respýblikalyq mańyzy bar qalalar, astana biýdjetteri arasyndaǵy 2020-2022 jyldarǵa arnalǵan jalpy sipattaǵy transfertterdiń kólemi týraly» Zańǵa sáikes, Atyraý oblysy «donor» bolyp sanalady. Bul turǵyda respýblikalyq biýdjetke 642 mlrd teńgeni, onyń ishinde 2021 jylǵa - 213,7 mlrd teńgeni aýdarýy kerek.
«Oblystyq biýdjetten joǵaryda kórsetilgen biýdjettik alymdardyń kólemi kezinde 2021 jyly respýblikalyq biýdjetten Atyraý oblysyna beriletin nysanaly transfertterdiń kólemi 56,9 mlrd teńgeni quraidy. Al basqa donor óńirler boiynsha múldem basqa kórinis qalyptasýda», - dedi senator.
Onyń aitýynsha, óńirdiń áleýmettik jáne infraqurylymyn damytý boiynsha QR Úkimeti deńgeiinde sheshýdi talap etetin birqatar máseleler bar. Búgingi kúni 2018-2019 jyldary bastalǵan biýdjettik investitsiialyq jobalardy oblys boiynsha tolyq aiaqtaý úshin 76,3 mlrd teńge qajet bolyp otyr, al jergilikti biýdjettiń damý bóligindegi múmkindigi shamamen 30 mlrd teńgeni quraidy.
«Budan basqa, 153 aýyldyq eldi mekenniń 12-si áli kúnge deiin ortalyqtandyrylǵan aýyz sýmen qamtamasyz etilmegen jáne 18 eldi mekenge aýyz sýdy arnaiy jetkizý uiymdastyrylǵan. Óńir respýblikada alǵashqy bolyp gazdandyrýdy bastaǵanyna qaramastan, áli kúnge deiin 18 aýyldyq eldi meken tabiǵi gazben qamtamasyz etilmegen. Biyldyń basynda oblys boiynsha apatty jaǵdaidaǵy 79 turǵyn úi tirkelgen. Apatty jaǵdaida - 4, úsh aýysymdy 11 mektep bar», - dedi depýtat.
«Joǵaryda baiandalǵannyń negizinde jáne búgingi tańda óńirdegi problemalardy eskere otyryp, respýblikalyq biýdjettiń negizgi donory retinde Atyraý oblysy damý biýdjetiniń mólsherin ulǵaitý bóliginde jalpy sipattaǵy transfertterdi esepteý ádistemesin qaita qaraýdy, al 2021-2023 jyldar biýdjetinde respýblikalyq biýdjetten ony naqtylaý jáne túzetý kezinde transfertterdi ulǵaitýdy suraimyz», - dedi Ǵumar Dúisembaev.
