Parlament Senatynyń depýtaty Baqytjan Jumaǵulov Memleket basshysy qol qoiǵan «Ardagerler týraly» Zańǵa qatysty pikir bildirdi, dep habarlaidy QazAqparat.
«Mańyzdy zań qabyldandy dep oilaimyn. Prezident Qasym-Jomart Toqaev «Ardagerler uiymy» respýblikalyq qoǵamdyq birlestigi ortalyq qeńesiniń tóraǵasy Baqtyqoja Izmuhambetovty qabyldaǵan kezde, ardagerler týraly zańdy qabyldaýdy jyldamdatý máselesine nazar aýdardy. Buǵan deiin osyndai júieli qujat bizde bolmaǵan. Bizde ardagerlerdiń áleýmettik jaǵynan qorǵalýyna únemi nazar aýdarylyp keldi, alaida ardagerler týraly biryńǵai zań bolmaǵan edi. Bul óz kezeginde elimizdiń ardagerleri týraly júielengen, keshendi jeke zań», - dedi B. Jumaǵulov.
Depýtattyń paiymynsha, ózge zańdardaǵy ardagerlerdi qoldaý qadamdary osy qujatta saqtalýy óte mańyzdy.
«Eń bastysy, memleket ardagerlerdi áleýmettik qoldaý kepildigine ekpin qoiyp otyr. Bul óz kezeginde saiasi ári áleýmettik turǵydan óte mańyzdy. Sondyqtan zańnyń Jeńistiń 75 jyldyǵy qarsańynda qabyldanýy simvoldyq mánge ie dep sanaimyn», - dedi senator.
«Bizdiń ákelerimiz soǵystyń qiyndyqtaryn bastan ótkerdi. El Prezidenti osyǵan deiin soǵysta bolǵan ákesi jaiynda estelikter aitqan bolatyn. Bul soǵystyń qiyndyqtaryn árbir otbasy sezindi. Atap aitqanda, «Ardagerler týraly» Zańnyń Jeńis kúni qarsańynda qabyldanýy barshamyzdy qýantty», - dedi B. Jumaǵulov.
Aita keteiik, Memleket basshysy «Ardagerler týraly» Qazaqstan Respýblikasynyń Zańyna qol qoiǵan bolatyn.
Budan buryn habarlanǵandai, 30 sáýir kúni Parlament Senatynyń jalpy otyrysynda «Ardagerler týraly» Zań qabyldandy.
Zań jobasynyń negizgi maqsaty – ardagerlerdi áleýmettik qorǵaýǵa bailanysty qoǵamdyq qatynastardy retteitin zańnamalyq aktilerdi júieleý, qaita qaraý jáne ardagerlerdiń jańa sanattaryn qalyptastyrý.
Sonymen qatar, jalpy otyrysta «Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.
Ony ázirleý qajettiligi birqatar zańnamalyq aktilerdi «Ardagerler týraly» zań jobasyna sáikes keltirýmen bailanysty. Negizgi jańa ózgerister áleýmettik tólemderge qatysty bolyp otyr.
