Akademik Salyq Zimanovtyń týǵanyna kelesi jyly 100 jyl tolady. Alaida, osy bir aitýly data Úkimettiń aldaǵy jyly atap ótetin mereitoilar tizbesinen tys qalǵan. Osyǵan orai Senattyń jalpy otyrysynda Muhtar Qul-Muhammed bastaǵan bir top senator Premer-Ministrdiń atyna depýtattyq saýal joldady.
Saýalda akademik Zimanovtyń otandyq zań ǵylymynyń damýyna sińirgen orasan zor eńbegi jáne elimizde bilikti zańgerler daiarlaýdyń negizin qalyptastyrǵan ustazdyq qyzmeti jan-jaqty baiandalǵan.
«Ol 1961 jyly Máskeýde doktorlyq dissertatsiiasyn qorǵaǵannan keiingi bar ǵumyryn qazaqstandyq zań ǵylymynyń damýyna arnady. Qazaq memlekettik ýniversitetiniń zań fakýltetin, Ulttyq ǵylym akademiiasynyń Filosofiia jáne pravo institýttaryn basqaryp, myńdaǵan shákir tárbielep, 30-dan astam ǵylym doktory men kandidattaryn daiarlady. Onyń shákirtteri Qazaqstanda ǵana emes, TMD elderinde kóptep sanalady», – dedi Muhtar Qul-Muhammed.
Salyq Zimanov dese, eń aldymen, elimizdiń egemendigi eske túsedi. Óitkeni, Qazaqstannyń táýelsizdigine dańǵyl jol salyp bergen basty qadam 1990 jyldyń 25 qazanynda qabyldanǵan Qazaq KSR-niń «Memlekettik egemendigi týraly» Deklaratsiiasy edi. Onyń jobasyn daiyndaǵan depýtattyq komissiianyń basshysy dál osy Zimanov bolatyn.
Ǵalym 1991 jyly 14-16 jeltoqsanda «Qazaqstan Respýblikasynyń Memlekettik táýelsizdigi týraly» konstitýtsiialyq zańyn qabyldaý barysynda komissiiasynyń quramyna kirip, tarihi qujattyń qabyldanýyna zańger depýtat retinde zor úles qosty.
«Onyń sol kezde sóilegen sózderi men tegeýrindi pikirleri Parlament muraǵatynda sairap tur. Salyq Zimanov 1994 jyly Joǵarǵy Keńeske ekinshi márte depýtat retinde sailanyp, ómiriniń sońyna deiin elimizdiń qoǵamdyq-saiasi ómirindegi eleýli oqiǵalardyń bárine derlik abyz aqsaqal retinde belsene aralasty. Senat pen Májilis tóraǵalary, Premer-Ministr jáne respýblikalyq quqyqtyq organ basshylaryna udaiy óziniń tolymdy usynys, taǵylymdy pikirlerin joldap otyrdy. Elbasynyń saiasi-quqyqtyq reformalaryna únemi qoldaý kórsetti», – dedi senator.
Saýalda Salyq Zimanovtyń Uly Otan soǵysyna qatysqan maidanger ǵana emes, naǵyz qaharman ekenine de nazar aýdarylǵan. Ásirese, onyń «I dárejeli Otan soǵysy» ordenimen marapattalǵany, dańqty qolbasshy, marshal K.K.Rokossovskiidiń tikelei basshylyǵymen shaiqasqany jáne soǵysty ańyzǵa ainalǵan batyr Baýyrjan Momyshulymen birdei áskeri shende – polkovnik dárejesinde aiaqtaǵany erekshe aitylǵan.
Muhtar Qul-Muhammed akademiktiń ǵasyrlyq mereitoiyn laiyqty deńgeide atap ótýdiń ulttyq jáne eldik múdde turǵysynan mańyzy óte zor ekenin aityp, Úkimetke osy baǵyttaǵy birqatar usynystaryn joldady. Naqty aitqanda, senator qaharman ǵalymnyń ómiri men shyǵarmashylyǵyna arnalǵan halyqaralyq ǵylymi-praktikalyq konferentsiia, tanym-taǵylymdyq sharalar ótkizý, onyń esimin Atyraý men Almaty qalalarynyń kóshelerine jáne Nur-Sultan qalasyndaǵy jańadan salynǵan mektepterdiń birine berý, týǵan jerinde eńseli eskertkishin ornatý máselesin qarastyrýdy surady.
