Soltústik Qazaqstan oblysynda Senat depýtattyǵyna sailaý ótip, túrli deńgeidegi máslihat depýtattarynyń basym bóligi óz daýystaryn Olga Perepechinaǵa berdi, dep habarlaidy "Ult aqparat".
SQO-da Senat depýtatyn sailaýǵa oblystyq, aýdandyq jáne qalalyq máslihattardyń 200-ge jýyq depýtaty qatysty. Sailaýǵa túsýge 5 kandidat niet bildirgen edi. Olardyń úsheýi resmi tirkeldi. Alaida, bir kandidat óz qalaýymen tizimnen shyqty. Nátijesinde jinalǵandar eki kandidat - Dangole Mogýnova men Olga Perepechinaǵa daýys berdi. Olardyń ekeýi de «Nur Otan» partiiasynyń múshesi. Sailaý barlyq karantin talaptary saqtala otyryp, dástúrli formatta ótti.
«Sailaýshy retinde 194 adam tirkelgen bolatyn. Búgingi sailaýǵa onyń 188-i qatysty. Sailaýdy barlyq talaptarǵa sai ótkizdik. Sanitarlyq-epidemiologiialyq normalardy da esten shyǵarǵan joqpyz. Barlyq erejeler saqtalǵan kúide, ádil túrde ótti», - deidi SQO Sailaý komissiiasynyń tóraǵasy Erbolat Bekshenov.
Sailaý nátijesi boiynsha Olga Perepechina 87,6 % - 162 daýys alyp, jeńiske jetti. Qarsylasynan aiqyn kórsetkishpen basym túsken Olga Perepechina ózin qoldaǵandarǵa alǵys bildirip, qyzmetin adal atqarýǵa ýáde berdi.
QR Parlament Senatyna depýtat bolyp qaita sailanǵan Olga Perepechina 1989 jyly Qorǵan aýylsharýashylyq institýtynyń «Ekonomika jáne aýylsharýashylyq óndiristi uiymdastyrý» mamandyǵy boiynsha bitirgen.
