Parlament Senatynyń Tóraǵasy Máýlen Áshimbaev palata janyndaǵy Jas sarapshylar klýbynyń múshelerimen kezdesti, dep habarlaidy "Ult aqparat".
Palatanyń baspasóz qyzmetinen málim etkendei, kezdesýdi ashqan Senat Tóraǵasy is-sharaǵa qatysýshylarǵa Prezident Joldaýyn iske asyrýǵa qatysty elimizdiń aldynda turǵan basty mindetterdi, sondai-aq Senat pen sarapshylar qaýymdastyǵy arasyndaǵy yntymaqtastyqtyń ózara is-qimyl múmkindikterin talqylaýdy usyndy.
Máýlen Áshimbaev óz sózinde memleketimiz ben qoǵamymyzdyń qazirgi kezeńdegi damýyn aiqyndaityn úrdisterge taldaý jasady.
«Senattyń aldynda turǵan negizgi mindet – Memleket basshysynyń Joldaýynda kórsetilgen barlyq basymdyqtardy zańnamalyq turǵydan qamtamasyz etý. Osy jumys barysynda bizge qoǵamdyq uiymdar men ártúrli sala mamandarynyń pikirin tyńdaý, olardy eskerý mańyzdy. Sondyqtan búgin Senat janynan Jas sarapshylar klýbyn qurýdy usynamyz. Sizderdiń bilimderińiz, kúsh-qýattaryńyz jáne tájiribelerińiz Qazaqstandy ózgertýge jáne Prezidentimizdiń reformalaryn iske asyrýǵa tyń serpin beredi dep senemin», – dedi Senat Tóraǵasy.
Sonymen qatar Máýlen Áshimbaev Memleket basshysynyń jańǵyrtý baǵdary men Joldaýyn júzege asyrý kezinde basshylyqqa alatyn qaǵidalardy atap ótti. Birinshisi – júielilik qaǵidasy.
«Qazir el damýynyń basqa baǵyttaryn eskerýsiz qaldyryp, bir salany ǵana reformalaýǵa bolmaidy. Mysaly, saiasi reformalarsyz ekonomikalyq damý bolmaidy. Memlekettik basqarý júiesinde reforma júrgizbese ekonomikada eleýli ózgerister bola qoimaidy. Óz kezeginde memlekettik basqarýdaǵy ilgerileý bilim sapasyna tikelei bailanysty», – dedi Máýlen Áshimbaev.
Ekinshisi – standartty emes sheshimder qaǵidasy. «Búgingi álem tym kúrdeli jáne tez ózgerýde. Ol burynǵy qabyldaýlar men júieleýge sai kelmeidi. Sondyqtan memleket pen qoǵamǵa problemalardy sheshýdiń standartty emes tásilderi qajet», – dep atap ótti Senat Tóraǵasy.
Úshinshisi – máseleniń mán-mańyzyna zer salý.
«Qazirgi shyndyqqa sáikes kele bermeitin aqparattar jáne qoǵamdyq sanany manipýliatsiialaý dáýirinde syrtqy kórinisterge emes, ishki mazmunǵa nazar aýdara otyryp, qubylystar men protsesterdiń mánin túsiný qajet», – dedi Máýlen Áshimbaev.
Kezdesý barysynda Klýb músheleri Prezidenttiń «Jańa jaǵdaidaǵy Qazaqstan: is-qimyl kezeńi» atty Joldaýyn iske asyrýǵa qatysty óz oilaryn aitty.
Pikirtalasqa qatysýshylar memleket pen qoǵamdy odan ári jańǵyrtý úshin zańnamalyq qyzmette jas salalyq sarapshylardyń áleýetin paidalanýdyń mańyzy zor ekenin atap ótti.
Jas sarapshylar klýbynyń quramynda memlekettik basqarý, ekonomika, qarjy, áleýmettik qoldaý, sot-quqyqtyq reforma, bilim berý, densaýlyq saqtaý jáne tsifrlandyrý salalary boiynsha 30-dan astam maman bar. Klýbtyń aldaǵy otyrystary ózekti qoǵamdyq-saiasi, ekonomikalyq jáne áleýmettik máselelerge arnalady.
