QR Parlamenti Senaty janynan «Ulttyq múdde» atty jańa dialog alańy quryldy. Bul týraly búgin elimizdiń qoǵam ókilderimen kezdesken Senat Tóraǵasy Máýlen Áshimbaev aitty, dep habarlaidy QazAqparat.
«Otyrysymyzǵa memleket jáne qoǵam qairatkerleri, depýtattarymyz, ádebietimizdiń, mádenietimizdiń, ǵylymnyń belgili ókilderi qatysyp otyr. Barshańyzǵa ýaqyt taýyp, búgingi otyrysqa qatysyp otyrǵandaryńyz úshin rizashylyǵymyzdy bildiremiz. Qazirgi tańda elimizde úlken tarihi kezeń bastalýda. Prezidentimiz Qasym-Jomart Kemeluly Toqaevtyń bastamasymen Jańa Qazaqstandy qurýdy qolǵa aldyq. Bul kúrdeli ózgeristerdiń jedeldeýine qasiretti qańtar oqiǵasynyń da áseri zor boldy. Endigi jerde ótken qaiǵyly oqiǵalardy saraptap, olardan durys qorytyndy shyǵarý asa mańyzdy. Bul bizdiń baiandy bolashaǵymyz úshin sheshýshi mánge ie», - dedi is-sharany ashqan Senat Tóraǵasy.
Onyń atap ótýinshe, Jańa Qazaqstandy qurý jolynda depýtatarǵa ziialy qaýymmen, aqyn-jazýshylarmen, ǵalymdarmen aqyldasyp, pikirlesip otyrýdyń mańyzy zor.
«Sol maqsatpen Senat janynan jańa dialog alańyn quryp jatyrmyz. Onyń atyn «Ulttyq múdde» dep ataýdy usynyp otyrmyz. Qazir ártúrli pikirtalas alandary jeterlik ekeni belgili. Bizdiń jobanyń ereksheligi – depýtattar men ziialy qaýym ókilderin tarta otyryp, ulttyq múddemizge, ulttyq qundylyqtarǵa, ulttyń bolashaǵyna qatysty mańyzdy máselerdi talqylaý jáne osy baǵyttaǵy naqty is-sharalardy anyqtaý. Ári qarai olardyń júzege asyrylýyna uiytqy bolý. Osyndai maqsatpen osy dialog alańyn uiymdastyryp otyrmyz. Onyń jumysyna ózderińiz, basqa da azamattar belsendi qatysady dep senemiz», - dedi Máýlen Áshimbaev.
