Parlament Senatynyń jalpy otyrysynda Qazaqstan Respýblikasy Ekologiialyq kodeksi eki oqylymda qaralyp, qabyldandy, dep habarlaidy "Ult aqparat".
Ekologiia, geologiia jáne tabiǵi resýrstar ministri Maǵzum Myrzaǵalievtiń aitýynsha, «Lastaýshy tóleidi» qaǵidatynyń negizine lastanýdy boldyrmaý men baqylaý boiynsha is-sharalary jatady. Sonymen qatar, qorshaǵan ortaǵa tigen zalaldy qalpyna keltirýge qatysty jaýapkershilik qarastyrylǵan. Osylaisha, memleket tabiǵat paidalanýshylarǵa ekologiialyq aiyppul tóleýdiń ornyna qorshaǵan ortaǵa teris áserdi boldyrmaý jónindegi barlyq sharalardy qabyldaý tiimdirek bolatyndai jaǵdai jasaýy tiis.
Budan basqa, ekologiialyq zalal oryn alǵan jaǵdaida tabiǵat paidalanýshy qorshaǵan ortany bastapqyda bolǵan qalpyna keltirýge mindetti.
«Eń ozyq qoljetimdi tehnologiialardy engizedi degen shartpen birinshi sanattaǵy obektiler úshin keshendi ekologiialyq ruqsattarǵa kóshý usynylady. Sondai-aq jańadan iske qosylatyn kásiporyndar úshin keshendi ekologiialyq ruqsattar alý mindettiligi qarastyryldy. Eń ozyq qoljetimdi tehnologiialardy engizýdiń arqasynda elimizdegi ekologiialyh ahýal jaqsarady. Birinshi kezeńde munai-gaz, taý-ken metallýrgiiasy, himiia jáne elektr energetikasy salalaryna qatysty 50 iri kásiporyndy eń ozyq qoljetimdi tehnologiialarǵa aýystyrý josparlanǵan. Aita keterlik, osy 50 kásiporynǵa jalpy lastanýdyń 80 paiyzy tiesili», - dedi Maǵzum Myrzaǵaliev.
Kodekstiń jobasynda birinshi sanattaǵy iri kásiporyndarǵa qatysty qorshaǵan ortaǵa áserdi baǵalaýdy ótý týraly talap qarastyryldy. Olardyń tizbesi qaita qaraldy jáne negizinen ekologiialyq qaýipti obektilerge basa nazar aýdarylatyn bolady.
Ekinshi oqylymda talqylaý kezinde senator Ábdáli Nuraliev qaralyp otyrǵan Ekologiialyq kodeks qorshaǵan ortany qorǵaýda oń nátijege alyp keletinin aitty. Kodeks jobasy ekologiialyq zańnamany jetildirý jáne jańartý, qorshaǵan ortany qorǵaý jáne tabiǵatty paidalanýshylardyń qyzmetin ekologiialyq retteýdiń tiimdiligin arttyrý salasyndaǵy memlekettik basqarýdyń tiimdi júiesin qalyptastyrý, Qazaqstan Respýblikasynyń qorshaǵan ortany qorǵaý salasyndaǵy halyqaralyq sharttyq jáne ózge de mindettemeleriniń oryndalýyn qamtamasyz etý maqsatynda ázirlendi.
Sonymen qatar, ilespe zań jobalaryna tolyqtyrýlar engizilgendikten, qujattar Májiliske qaitaryldy.
