Búgin Senattyń jalpy otyrysynda «Jer qoinaýy jáne jer qoinaýyn paidalaný týraly» Qazaqstan Respýblikasynyń Kodeksine ýran óndirý máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa tolyqtyrý engizilgendikten, zań jobasy Májiliske qaitaryldy, dep habarlaidy "Ult aqparat".
Zań jobasy Qazaqstan Respýblikasynyń ýran óndirý salasyndaǵy zańnamasyn jetildirý maqsatynda ázirlendi.
«Zań jobasy Senat komitettiń keńeitilgen otyrysynda ekinshi oqylymda qaraldy. Qujat elimizdegi ýran óndirý salasyn quqyqtyq retteýdi jetildirýge baǵyttalǵan. Memleket basshysynyń biylǵy 26 qańtarda Úkimettiń keńeitilgen otyrysynda memlekettik jáne jeke operatorlardy qurýǵa tyiym salý jónindegi bergen tapsyrmasyn oryndaý maqsatynda Senat depýtattary zań jobasynyń birinshi babynyń besinshi tarmaqshasynyń 14,15,16,17,18-shi jáne 19-shy abzatsty alyp tastaýdy usynyp otyr. Úkimettiń biylǵy 17 aqpanda kelgen qorytyndysyna sáikes, bul usynys qoldaý tapty. Zań jobasyndaǵy barlyq túzetýler ýran salasyndaǵy karym-qatynastardy ári qarai jetildirýge baǵyttalǵan. Sondyqtan, zań jobasynyń bastamashylaryna, Parlament Májilisiniń depýtattaryna alǵysymyzdy bildiremiz», - dedi senator Baýyrjan Qaniev.
Baiandalǵandy eskere kele, Senattyń Ekonomikalyq saiasat, innovatsiialyq damý jáne kásipkerlik komiteti Parlament Májilisi maquldaǵan «Jer qoinaýy jáne jer qoinaýyn paidalaný týraly» Qazaqstan Respýblikasynyń Kodeksine ýran óndirý máseleleri boiynsha ózgerister men tolyqtyrýlar engizý týraly» Zań jobasyna ózgeristi Konstitýtsiianyń 61-babynyń 5-tarmaǵyna sáikes Parlament Májilisine jiberýdi usynady.
Sheshim qabyldaý barysynda palata depýtattary bul usynysqa qoldaý bildirdi.
Budan buryn habarlanǵandai, qujat boiynsha geologiialyq qorlardy esepteý jónindegi esepke sáikes bastapqy qorlardan otyz jáne odan da kóp paiyzdan asatyn ýran ken orny qorlary ósiminiń kólemderi bolǵan kezde ýran óndirýge arnalǵan kelisimshartta óńirdiń áleýmettik-ekonomikalyq damýyna baǵyttalǵan jobany iske asyrý jónindegi qosymsha mindettemelerdi belgileý týraly talaptar engiziledi.
Bul qujat bir top Parlament depýtatynyń bastamasymen ázirlengenin aita ketken jón.
