Búgin Parlament Senatynyń jalpy otyrysynda «QR Ulttyq qorynan 2021 - 2023 jyldarǵa arnalǵan kepildendirilgen transfert týraly» Zańy qabyldandy, dep habarlaidy QazAqparat.
Qujatta Ulttyq qordan kepildendirilgen transfert 2021 jyly – 2 trln 700 mlrd teńge, 2022 jyly – 2 trln 400 mlrd teńge, 2023 jyly – 2 trln 200 mlrd teńge somasynda eskerilgen.
«Zań jobasynda sondai-aq kepildendirilgen transfertti paidalanýdyń nysanaly baǵyty aiqyndaldy. Osy qarajat respýblikalyq biýdjetten ortaq zeinetaqylardy tóleýge jáne memlekettik bazalyq zeinetaqy tólemderine baǵyttalady. Atalǵan kepildendirilgen transfert Ulttyq qordaǵy qarajattyń jalpy ishki ónimniń 30 paiyz mólsherinde tómendemeitin qaldyq boiynsha shartty qamtamasyz etedi», - dedi QR Ulttyq ekonomika ministri Rýslan Dálenov.
