Senat Tóraǵasy Máýlen Áshimbaev Memleket basshysynyń tapsyrmasy boiynsha Qyzylorda oblysynda bolyp, Táýelsizdiktiń 30 jyldyǵyna arnalǵan saltanatty is-sharaǵa qatysty. Máýlen Áshimbaev oblys turǵyndary aldynda sóz sóilep, Qazaqstannyń ótken kezeńdegi negizgi jetistikterine toqtaldy.
«Táýelsizdik jyldarynda bizdiń memlekettiligimiz tolyq qalyptasty. Irgemiz bekip, shekaramyz birjola shegendeldi. Memlekettik institýttardyń berik negizi qalandy. Eskirgen josparly ekonomikadan ýaqyt talabyna sai jańa ekonomikalyq modelge kóshtik jáne ony nyǵaita tústik», – dedi Senat Tóraǵasy.
Ol sondai-aq Qazaqstannyń halyqaralyq qoǵamdastyqtyń tolyqqandy jáne yqpaldy múshesine ainalǵanyn atap ótti. Qazaqstannyń Tuńǵysh Prezidenti – Elbasy Nursultan Nazarbaevtyń saiasatynyń arqasynda elimizdiń ortalyǵynda múldem jańa – Nur-Sultan qalasy salyndy. Elordanyń salynýy elimizdiń búkil ekonomikasy men óńirlerdiń damýyna serpindi áser etti. Máýlen Áshimbaev osy jyldar ishinde Qyzylorda oblysy da qarqyndy damyp, qazir mańyzdy indýstriialyq jáne agrarlyq óńirge ainalǵanyn tilge tiek etti. Senat Tóraǵasy Aral problemasyn sheshý máselesine de nazar aýdardy.
«Tek Táýelsizdik alǵannan keiin ǵana Aral problemasyna shynaiy mán berile bastady. Tuńǵysh Prezidentimizdiń usynysymen «Syrdariia ózeniniń arnasyn retteý jáne Aral teńiziniń soltústik bóligin saqtaý» jobasy qolǵa alyndy. Osynyń nátijesinde Soltústik Araldyń arnasy tolyp, kóptegen biologiialyq túrler qalpyna kelgeni bárimiz úshin úlken qýanysh», – dep atap ótti Máýlen Áshimbaev.
Sondai-aq Senat Tóraǵasy el Prezidenti Qasym-Jomart Toqaevtyń bastamasymen Qazaqstanda saiasi, áleýmettik jáne ekonomikalyq reformalardyń jańa kezeńi bastalǵanyn aitty.
«Prezidentimizdiń tapsyrmasy boiynsha memlekettik basqarý salasynda júieli reformalar júzege asýda. «Halyq únine qulaq asatyn memleket» tujyrymdasy negizgi qaǵidaǵa ainaldy. Jergilikti ókildi jáne atqarýshy biliktiń derbestigin arttyrý úshin mańyzdy qadamdar jasaldy. Biyl tuńǵysh ret aýyl ákimderiniń tikelei sailaýy ótti. Bul ózgeris halyqtyń jergilikti bilikti jasaqtaýǵa tikelei yqpal etýine jol ashty», – dedi Senat Tóraǵasy.
Máýlen Áshimbaev sondai-aq el Prezidentiniń óńirlerdi damytýǵa erekshe nazar aýdaryp otyrǵanyn aitty. Memleket basshysy biylǵy qazan aiynda 10 ulttyq jobany bekitken bolatyn. Olardyń qatarynda «Qýatty óńirler – el damýynyń draiveri» arnaiy jobasy da bar.
«Bes jyl ishinde Óńirlerdi damytý boiynsha ulttyq jobany iske asyrýǵa aitarlyqtai qarajat bólinedi dep josparlanýda. Elimizdiń «ishki bailanysyn» kúsheitý mindeti júktelip otyr. Ishki kólik jelisin damytý úshin respýblikalyq mańyzy bar jáne jergilikti mańyzǵa ie joldar salynyp, qaita jańǵyrtylady. Bul Syr eliniń kólik-logistikalyq áleýetin odan ári arttyra túsetini sózsiz», – dedi Máýlen Áshimbaev.
Saltanatty shara barysynda Senat Tóraǵasy el Prezidentiniń atynan elimizdiń jáne óńirdiń damýyna erekshe úles qosqan qyzylordalyqtarǵa memlekettik nagradalardy tabys etti.
Óńirge sapary barysynda Máýlen Áshimbaev Qyzylorda qalasynda tabaq shyny óndirý jáne óńdeý zaýytyn iske qosý rásimine qatysty. Oblys ákimi Gúlshara Ábdiqalyqovanyń aitýynsha, Táýelsizdiktiń 30 jyldyq mereitoiy qarsańynda iske qosylǵan bul kásiporynnyń óńir úshin mańyzy zor ári aimaq ekonomikasyna oń áser etýge tiis.
«Jergilikti shikizattyń 90 paiyzy shyny óndirisinde paidalanylady. Soda kúli shyny qunynyń 80 paiyzyn quraityn negizgi bólik. Sondyqtan Aral qalasynda salynatyn soda zaýyty kásiporynnyń basty jabdyqtaýshysy bolady. Shyny zaýyty tolyq qýatymen jumys istegen kezde 226 jańa jumys orny ashylady, qosalqy óndiristerde 300-ge jýyq turaqty jumys orny iske qosylady, biz birinshi kezekte jergilikti mamandarǵa basymdyq beremiz», – dedi Gúlshara Ábdiqalyqova.
Máýlen Áshimbaev sonymen qatar, «Nurly jer» memlekettik baǵdarlamasy aiasynda salynǵan 50 páterli turǵyn úidiń kiltin tapsyrý rásimine jáne sporttyq-saýyqtyrý kesheniniń ashylýyna qatysty.
«Táýelsizdiktiń 30 jyldyǵy – elimiz úshin mańyzdy meje, aitýly beles. Qazaqstan bul kezeńge iri jetistiktermen jetip otyr. Al, endigi mindet – barymyzdy baǵalap, jeńisti jolymyzdy jalǵaý. Biz árdaiym Táýelsizdigimizdi saqtaýǵa, qorǵaýǵa jáne nyǵaitýǵa kúsh salýymyz qajet. Ol úshin tatýlyǵymyz berik, birligimiz bekem, tirligimiz tiianaqty bolýǵa tiis. Osy baǵytta bárimiz jumylyp, nátijeli eńbek ete beremiz dep senemin», – degen Máýlen Áshimbaev qyzylordalyqtardy Táýelsizdiktiń 30 jyldyǵymen quttyqtap, olarǵa baq-bereke tiledi.
