Joldaýdyń túp negizi – memlekettilikti nyǵaitý, táýelsizdikti tuǵyrly etý. Bul týraly búgin elimizdiń qoǵam ókilderimen kezdesken Senat Tóraǵasy Máýlen Áshimbaev aitty, dep habarlaidy QazAqparat.
«Sonymen qatar, Joldaýda azamattardyń el isine aralasýyn kúsheitetin bastamalar aityldy. Memlekettik biliktiń birden-bir bastaýy – halyq. Konstitýtsiianyń osy normasyn saiasi praktikada júzege asyratyn ýaqyt keldi. Kez kelgen demokratiialyq qoǵamda halyqtyń talap-tilegi – biliktiń negizgi basymdyǵy. Árbir azamat bilik ókilderine ótinishterin jetkize alatynyna, olarǵa qulaq asatynyna senimdi bolýǵa tiis. Prezidentimiz Joldaýda osyndai irgeli qaǵidalardyń nyǵaiýyn qamtamasyz etetin sheshýshi bastamalardy qolǵa alyp otyr. Basqa da kóptegen usynystar keshe jariialandy», - dedi Senat Tóraǵasy.
Osy rette Máýlen Áshimbaev Parlamentti úlken ári jaýapty jumystar kútip turǵandyǵyn basa aitty.
«Joldaýdyń aiasynda Ata Zańymyzdyń 30-dan astam babyna ózgeris engizemiz. Taǵy 20-dan astam zań qabyldanady. Biraq, Joldaýdy iske asyrý tek bilik tarmaqtarynyń mindeti ǵana emes. Bul – ortaq múdde, kóp bolyp jumylatyn is. Eldik iste ziialy qaýymnyń da alatyn orny erekshe. Joldaýdyń túp negizi – memlekettilikti nyǵaitý, táýelsizdikti tuǵyrly etý. Qańtar oqiǵasy memlekettilik ózdiginen qalyptaspaitynyn, ol úshin árdaiym kúresý qajet ekenin aiqyn kórsetti. Az ǵana kúnniń ishinde eldigimizden aiyrylyp qala jazdadyq. Qai zamanda da qazaqtyń ziialysy eldik pen egemendikti qorǵaýdy óziniń qasietti paryzy sanaǵan. Qazirgi kezeńde osy mindet eselenip otyr desek, artyq aitqandyq emes. Ziialy qaýymnyń memlekettilikti bekemdeýge úndeitin qairatkerlik kúshi osy tusta asa qajet», - dedi ol.
