QR Parlamenti Senatynyń tóraǵasy Máýlen Áshimbaev Qazaqstannyń meditsina salasynyń mamandaryn kásibi merekesimen quttyqtady, dep habarlaidy "Ult aqparat".
«Elimizdegi barsha meditsina qyzmetkerlerin kásibi merekelerimen shyn júrekten quttyqtaimyn!
Densaýlyq saqtaý júiesi qashanda elimiz úshin eń negizgi salalardyń biri. Ásirese, pandemiia bastalǵaly beri densaýlyqtyń qadirin burynǵydan da artyǵyraq túsinip jatyrmyz. Osy kezeńde aq halatty abzal jandardyń qoǵamdaǵy orny men atqaratyn róli qanshalyqty mańyzdy ekenine anyq kóz jetkizdik.
Juma kúni elordamyzda indetpen kúres jumystaryna zor úles qosqan meditsina qyzmetkerlerine arnalyp «Altyn júrek» eskertkishi ashyldy. Saltanatty rásimde Memleket basshysy dárigerlerdiń qoǵamdaǵy mártebesin arttyrý úshin «Qazaqstan Respýblikasynyń eńbek sińirgen dárigeri» ataǵyn engizýdi usyndy. Ataqpen birge materialdyq syiaqy da beriledi. Munyń bári osy baǵytta ter tógip júrgen mamandardyń eńbegine berilgen laiyqty baǵa ekeni sózsiz.
Barsha meditsina qyzmetkerlerin merekelerińizben quttyqtai otyryp, sizderge zor densaýlyq, baq-bereke jáne tolaiym tabys tileimin! Árdaiym kásibiliktiń biiginen kórine berińizder!», - dep jazdy Máýlen Áshimbaev óziniń Facebook jelisindegi paraqshasynda.
Aita keteiik, meditsina salasynyń qyzmetkerleri kásibi merekelerin jyl saiyn maýsymnyń úshinshi jeksenbisinde atap ótedi. Bul kúndi merekeleý 1998 jyly Qazaqstan Respýblikasy Prezidentiniń Jarlyǵymen bekitilgen.
