Foto: Senat baspasóz qyzmeti
Memleket basshysy Qasym-Jomart Toqaevtyń tapsyrmasymen Parlament Senatynyń tóraǵasy Máýlen Áshimbaev Iran prezidenti Masýd Pezeshkiandy ulyqtaý rásimine qatysty.
Sondai-aq Palata spikeri Islam keńesi májilisiniń tóraǵasymen jáne Islam mádenieti jáne bailanystary uiymynyń basshysymen kezdesti. Ekijaqty kezdesýler barysynda taraptar Qazaqstan men Iran arasyndaǵy qarym-qatynasty arttyrý jáne parlamentaralyq yntymaqtastyqty nyǵaitý máselelerin talqylady.
Máýlen Áshimbaev Qazaqstan Prezidenti Qasym-Jomart Toqaevtyń atynan Iran Islam Respýblikasynyń jańadan sailanǵan prezidenti Masýd Pezeshkiandy sailaýdaǵy jeńisimen quttyqtady. Sonymen qatar ol Qazaqstan eki el arasyndaǵy yntymaqtastyqty odan ári damytýǵa basa mán berip otyrǵanyn atap ótti.
"Sizge Qazaqstan Respýblikasynyń Prezidenti Qasym-Jomart Kemeluly Toqaevtyń quttyqtaýy men jyly lebizin jetkizýge ruqsat etińiz. Memleket basshysy bizdiń elderimiz arasyndaǵy ekijaqty saiasi jáne ekonomikalyq yntymaqtastyqty damytýǵa erekshe kóńil bólip otyr. Iran – Kaspii óńirindegi kórshimiz, sondai-aq, Taiaý jáne Ortalyq Shyǵystaǵy mańyzdy saýda seriktesterimizdiń biri. Sondyqtan Iranmen qarym-qatynasty nyǵaitý bizdiń syrtqy saiasatymyzdaǵy basym baǵyttardyń biri bolyp qala beredi. Bul rette Qazaqstan Parlamenti óz tarapynan elderimiz arasyndaǵy bailanysty jan-jaqty nyǵaitýǵa yqpal etedi", – dedi Máýlen Áshimbaev.
Sonymen qatar Senat tóraǵasy Iran tarapyna atalǵan eldiń delegatsiiasy Shanhai yntymaqtastyq uiymynyń Sammitine belsendi qatysqany úshin alǵys bildirdi. Sammittiń nátijesinde mańyzdy 25 qujat, onyń ishinde Astana deklaratsiiasy qabyldanǵany belgili.
Suhbat kezinde parlamentaralyq yntymaqtastyq máseleleri de sóz boldy. Sonyń aiasynda Qazaqstan Parlamentiniń qos Palatasynda Iranmen dostyq toptary jumys isteitini aityldy. Odan bólek, Irannyń jańartylǵan Parlamentinde osyndai top qurý ekijaqty qarym-qatynasqa oń áser etetinine de nazar aýdaryldy.
Islam keńesi májilisiniń tóraǵasy Mohammad Bager Galibafpen kezdesýde Máýlen Áshimbaev Qazaqstan men Iran Parlamentteriniń yntymaqtastyǵyn odan ári nyǵaitý perspektivasyna toqtaldy. Palata Tóraǵasy zań shyǵarý salasyndaǵy ózara bailanystyń negizgi baǵyttaryn atap ótti.
"Qazaqstan Parlamenti Irannyń Islam keńesi májilisimen ózara bailanysty arttyrýǵa múddeli. Bizdiń Parlamentterimizde jumys istep kele jatqan dostyq toptary parlamentaralyq yntymaqtastyqtyń berik negizin quraidy. Bul baǵytta ózara bailanysty praktikalyq mazmunǵa basymdyq bere otyryp, qalyptastyrǵan mańyzdy. Sondai-aq eki el úshin ózekti máselelerdi oń sheshýge yqpal etý jáne zań shyǵarý isinde tájiribe almasý da airyqsha mánge ie", – dedi Máýlen Áshimbaev.
Budan basqa, Senat Tóraǵasy Islam mádenieti jáne bailanystary uiymynyń prezidenti Mohammad Mehdi Imanipýrmen kezdesti. Onda taraptar eki halyqtyń mádeni jáne rýhani bailanystaryn nyǵaitý máselelerine nazar aýdardy. Bul rette jahandyq syn-qaterlerdi eńserý jolynda róli artyp kele jatqan rýhani diplomatiiaǵa jáne osy baǵytta kúsh biriktirýdiń mańyzyna asa mán berildi.
"Biyl qazan aiynda Álemdik jáne dástúrli dinder kóshbasshylary Sezi Hatshylyǵynyń XXII otyrysyn ótkizý josparlanyp jatyr. Onda Sezdi damytý Tujyrymdamasyn ári qarai iske asyrý máselesi talqylanady. Odan bólek, kelesi VIII Sezdiń taqyryby men ótkizý merzimi bekitiledi. Sondai-aq Jas dini liderler forýmy ótkiziledi. Atalǵan is-sharalarǵa Iran eliniń ókilderi belsendi qatysady dep úmittenemiz", – degen Máýlen Áshimbaev Iran tarapyna Álemdik jáne dástúrli dinder kóshbasshylary Seziniń bastamalaryna qoldaý tanytyp, forýmnyń qorytyndy qujattaryn ázirleýge belsendi qatysqany jáne dinaralyq kelisimniń ideialary men qundylyqtaryn dáripteýge qosqan úlesi úshin alǵys bildirdi.
