Senat Tóraǵasy Máýlen Áshimbaev Frantsiia Respýblikasynyń Qazaqstan Respýblikasyndaǵy Tótenshe jáne Ókiletti Elshisi Dide Kanesspen kezdesti, dep habarlaidy "Ult aqparat".
Kezdesý barysynda eki el arasyndaǵy yntymaqtastyqty odan ári nyǵaitý, onyń ishinde parlamentaralyq bailanysty arttyrý máseleleri sóz boldy.
«Qazaqstan Parlamentiniń eki palatasynda da Frantsiia Parlamentimen yntymaqtastyq boiynsha top jumys isteidi. Biz parlamentaralyq bailanysymyzdyń serpindi qarqynyn saqtaýǵa jáne frantsýz parlamentariimen syndarly jumys isteýge múddelimiz», – dedi Máýlen Áshimbaev.
Sonymen qatar Senat Tóraǵasy elderimiz arasyndaǵy mádeni-gýmanitarlyq bailanystyń tabysty damyp kele jatqanyn atap ótti. Eki memlekettiń qoldaýymen 2018 jyly «Abai-Vern» halyqaralyq bilim baǵdarlamasy qolǵa alynǵan edi. Búginde osy bastama boiynsha alǵashqy stipendiattar Frantsiiada oqýlaryn aiaqtap úlgerdi.
«Qazaqstandyq stýdentter Frantsiiada «Bolashaq» baǵdarlamasy boiynsha da bilim alýda. Qazirgi tańda bul baǵdarlamanyń túlekteri elimizde memlekettik qyzmette jáne jeke sektorda laiyqty eńbek etip júr. Sondai-aq, Almatyda «Sorbonna-Qazaqstan» institýtynyń jemisti jumysyn atap ótken jón. Qazaqstannyń birneshe qalasynda «Alians-Fransez» mádeni-bilim berý agenttiginiń ókildikteri jumys isteidi. Munyń bári elderimizdiń mádeni-gýmanitarlyq saladaǵy yntymaqtastyǵynyń naqty nátijesi ekeni sózsiz», – dedi Senat Tóraǵasy.
Odan bólek, Máýlen Áshimbaev Qazaqstan Parlamentiniń Senaty ekijaqty yntymaqtastyqqa qatysty osy jáne basqa da máseleler boiynsha tiisti jumystardy atqaryp, Qazaqstan men Frantsiia arasyndaǵy qarym-qatynasty ári qarai nyǵaitýǵa yqpal etýdi jalǵastyra beretinin jetkizdi.
